काठमाण्डौको बीग सिनेमामा सोमबार बेलुकी ५ बजेपछि एकाएक चहलपहल बढ्यो । नेपाली चलचित्रका चर्चित हस्तीदेखि पत्रकारहरुको बाक्लो उपस्थिती देखियो । चिनिएका अनुहारहरुको बाक्लो उपस्थिती रहेको बीग सिनेमा एकाएक भरियो ।
चैत्र २७ गतेबाट प्रदर्शनमा आउन लागेको चलचित्र ‘नाई नभन्नु ल ३‘को भव्य प्रिमियरमा अतिथीहरुको उपस्थिती बाक्लो थियो । निर्माणपक्षले सिट क्षमता भन्दा निमन्त्रणा धेरै गरेकाले पनि केहीले सिट पाएनन् ।
कार्यक्रममा नेपाली चलचित्रका धेरैजसो नायिकाहरु उपस्थित थिए । नायिका रेखा थापा, नम्रता श्रेष्ठ, वेनिशा हमाल, नन्दिता केसी कार्यक्रममा देखिए । पूर्व मिस नेपाल श्रृष्टी श्रेष्ठदेखि सदिक्षा श्रेष्ठ पनि चलचित्र हेर्न पुगेका थिए ।
सुन्दरीहरुको बाहुल्यता रहेको प्रिमियरमा नायकहरु भने केही कम देखिए । चलचित्रका मुख्य कलाकार प्रियंका कार्की, आर्यन सिग्देल, सुरज सिंह ठकुरी, आश्मा डीसी, अनुभव रेग्मी कार्यक्रमको आकर्षणमा देखिएका थिए । नायक आर्यन सिग्देल भने केही ढिला आएकाले पनि चलचित्र पुरै हेर्न पाएनन् ।
विकास आचार्यको निर्माणमा मुष्कान ढकालले निर्देशन गरेको यो चलचित्रले प्रेम र परिवारको कथा भनेको छ । चलचित्रका मुख्य भूमिकामा अनुभव रेग्मी देखिएका छन् । उनकै जिवनको सेरोफेरोमा चलचित्रलाई घुमाइएको छ ।
नायक आर्यन सिग्देल चलचित्रमा विशेष रुचाइएका छन् । आर्यनले निर्वाहा गरेको भूमिकाले दर्शकलाई हसाँउने मात्र होइन, वाधेको पनि छ । चलचित्रका केही संवादहरु मन छुने खालका छन् । गीतसंगीतमा बसन्त सापकोटाको काम उत्कृष्ट रहेको प्रतिक्रिया चलचित्र हेरेपछि धेरैले दिएका छन् ।
आफूले छाडेर मुष्कानलाई निर्देशनको जिम्मा दिएका विकास आचार्यले ‘नाई नभन्नु ल २’मा दर्शकलाई धेरै रुवाएकाले ‘नाई नभन्नु ल ३’मा केही कम गरेको बताए । निर्देशक मुष्कान ढकाललाई पहिलो चलचित्रबाट नै तारिफ मिलेको छ ।
प्रतिक्रिया 4