२ वैशाख, काठमाडौं । अन्तराष्ट्रिय क्रिकेट काउन्सिल आईसीसीले नेपालको घरेलु क्रिकेट संरचना र मैदान पुनर्निमाणमा जोड दिएको छ ।
फिलिप हृयूजप्रति श्रद्धान्जली दिन आयोजित खेलका क्रममा चैत अन्तिममा आईसीसी बोर्ड अफ डाइरेक्टर वली एडवर्ड्स र ग्लोबल डेभलोपमेन्ट प्रमुख टीम एण्डरसन नेपाल आएका थिए ।
हृयूजको सम्झनामा भएको खेल सफल भएकोमा दुबै अधिकारी निकै सन्तुष्ट देखिएका थिए । वली एडवड्र्स क्रिकेट अष्ट्रेलियाका अध्यक्ष समेत हुन् र उनले सार्वजनिक रुपमा नै श्रद्धान्जली खेल सफल भएकोमा खुलेर प्रशंसा गरेका थिए ।
क्यान स्रोतका अनुसार आईसीसीका ग्लोबल डेभलोपमेन्ट प्रमुख एण्डरसनले क्यानमा केही सुधारमा जोड दिएका छन् । ‘फद दि फिल्ड र अन दि फिल्ड सुधारका केही कुरा छन्’ क्यानका एक पदाधिकारीले भने ।
स्रोतका अनुसार आईसीसीले क्यानमा दक्ष जनशक्तिहरु राख्नु पर्नेमा जोड दिएको छ । खासगरी क्रिकेट अपरेसन म्यानेजर, डेभलोपमेन्ट अफिसर लगायतका अधिकारी राखेर क्यानलाई चुस्त र पाददर्शी बनाउने पर्ने उनीहरुको जोड थियो ।
आईसीसीले नेपालको घरेलु संरचना बलियो हुनु पर्नेमा जोड दिएको छ । साथै कीर्तिपुर मैदानको पूनर्निमाण र मुलपानीसहितका मैदान निर्माणमा पनि उनीहरुको चासो थियो । ‘अन्तराष्ट्रिय प्रतियोगिताका लागि मैदान पुनःनिर्माणमा उनीहरुले जोड दिएका छन्’ एक सदस्यले भने ।
आईसीसीले यसअघि नै सन् २०१७ सम्ममा नेपाललाई विश्व क्रिकेट लिग च्याम्पियनसिपमा तीन होम गेम दिएको छ । तर, त्यसका लागि कीर्तिपुर मैदानमा तत्काल सुधार गर्नु पर्ने हुन्छ ।
प्रतिक्रिया 4