१४ वैशाख, काठमाडौँ । एकीकृत नेकपा माओवादीले अध्यक्ष पुष्पकमल दाहालको संयोजकत्वमा केन्द्रीय उद्दार तथा राहत सहयोग समिति’ गठन गरेको छ ।
सो पार्टीको आज बसेको पदाधिकारीको बैठकले विपत्तीको समयमा जनताको उद्धार, राहत तथा पुनः स्थापनाका लागि सरकारसँग मिलेर काम गर्न सो समिति गठन गरेको हो ।
प्राकृतिक विपत्तिमा निधन भएका नागरिकलाई श्रद्धाञ्जलि दिँदै एमाओवादीले आफ्नो सम्पूर्ण पार्टी पङक्तिलाई परिचालन गर्ने निर्णय गरेको छ । उसले पार्टी पङक्तिलाई रक्तदान गर्न, पीडितलाई पिउने पानी उपलब्ध गराउन, घाइतेलाई अस्पताल पुर्याउन, बसोबासको लागि प्रबन्ध गर्न निर्देशन दिएको छ ।
महाविपत्तिलाई सामना गर्न देश भित्रका सबै पक्षका अतिरिक्त आवश्यक सहयोगका लागि अन्तर्राष्ट्रिय समुदायलाई आग्रह गरेको उपाध्यक्ष नारायणकाजी श्रेष्ठले जानकारी दिनुभयो ।
एमाओवादीले व्यवस्थापिका संसदको बैठक तत्काल बोलाउन सरकारसँग माग गर्दै सो बैठकबाटै विशेष योजना बनाई सभासदलाई प्रभावित क्षेत्रमा पठाउन र उद्दार कार्यलाई प्रभावकारी बनाउन सर्वदलीय अनुगमन समिति बनाउन ध्यानाकर्षण गराइएको उपाध्यक्ष श्रेष्ठले जानकारी दिनुभयो । रासस