५ भदौ, काठमाडौं । राष्ट्रिय खेलकुद परिषद् (राखेप) र शिक्षा मन्त्रालयको संयुक्त आयोजनामा उपत्यकाव्यापी सडक दौड प्रतियोगिता भदौ २२ गते हुने भएको छ ।
राष्ट्रिय शिक्षा दिवस तथा अन्तर्राष्ट्रिय साक्षरता दिवसको उपलक्ष्यमा हुन लागेको प्रतियोगितामा कक्षा ९ देखि १२ सम्ममा अध्ययनरत छात्र/छात्राले प्रतिस्पर्धा गर्न पाउने खेलकुद प्रतियोगिता तथा योजना विभागका प्रशासकीय अधिकृत मीनकुमार शर्माले जनाएका छन् ।
काठमाडौंलाई ५ सय, ललितपुरलाई ४ सय र भक्तपुरलाई ३ सय कोटा निर्धारण गरिएको छ । छात्रमा ५ किलोमिटर र छात्रामा ३ किलोमिटर दूरीमा प्रतिस्पर्धा हुनेछ ।
छात्र/छात्रा दुवै समूहमा दसौं स्थानमा दौड टुंग्याउने नगद पुरस्कारको हकदार बन्ने छन् । कूल पुरस्कार राशी १ लाख ४ हजार रुपैयाँ रहेको यो प्रतियोगितामा पहिलो हुनेले १५ हजार, दोश्रोले १० हजार, तेश्रोले ५ हजार तथा चौथोले ४ हजार नगद पुरस्कार प्राप्त गर्नेछन् । पाँचौंदेखि दसौं स्थानमा रहनेलाई समान ३-३ हजार नगदबाट पुरस्कृत गरिने छ ।
दौड त्रिपुरेश्वरस्थित दशरथ रंगशालाबाट सुरु भइ विभिन्न भागको परिक्रमा गरी पुनः दशरथ रंगशालामै आएर टुंगिनेछ । सहभागी हुन इच्छुकले भदौ २१ गतेसम्म नाम दर्ता गराइसक्नु पर्नेछ ।
प्रतियोगितालाई सफलतापूर्वक सम्पन्न गर्न राखेपका सदस्य-सचिव केशवकुमार विष्टको संयोजकत्वमा २४ सदस्यीय खेलकुद उपसमिति गठन गरिएको छ ।
