१० पुस, काठमाडौं । नेपाली समाज बहुजातीय, बहुसांस्कृतिक र बहुधार्मिक छ । र, हाम्रो समाजले एक अर्काको धर्म र संस्कृतिलाई सहजरुपमा आत्मसाथ समेत गर्दै आएको छ ।
शुक्रबार त्रिपुरेश्वरको वल्र्ड ट्रेड सेन्टरमा पुग्दा परम्परागत नेवारी पोशाकमा शान्ता क्लजको टोपी लगाएर सेल्फी खिचिरहेका युवतीले यस्तै सांस्कृतिक सहवरणको झल्को दिए ।
वर्ल्ड ट्रेड सेन्टरमा क्रिसमसको अवसरमा रमाएर नाचिरहेका युवायुवतीको निकै ठूलो भीड थियो । त्यहाँ वालवालिका पनि त्यसैगरी रमाइरहेका थिए । वल्ड ट्रेड सेन्टरको रौनक कुनै पश्चिमेली क्रिश्चियन धर्मावलम्बी राष्ट्रको भन्दा कम देखिँदैनथ्यो ।
क्रिसमस मनाएर झुमिरेहका केही मानिसलाई अनलाइनखबरले प्रश्न गर्दा थाहा भयो, त्यसरी रमाइलो गरिरहेका मध्ये कतिपय क्रिश्चिय धर्मावलम्बी भए पनि अधिकांश हिन्दुहरुसमेत थिए । कतिपय आफ्ना वालवालिकालाई रमाइलो गराउन पनि आएका थिए भने अधिकांश युवायुवती क्रिश्चियन धर्मप्रतिको सांस्कृतिक आकर्षणले भन्दा पनि रमाइलो गर्ने रहरले त्यहाँ बेला भएका थिए ।
कतिपय सहभागीले भने भूकम्प र नाकाबन्दीका कारण दसैं तिहारमा समेत खुशी मनाउन नपाएको भन्दै पीडा भुलेर खुशी मनाउन त्यहाँ आएको प्रतिक्रिया दिए ।
त्रिपुरेश्वरमा जस्तै कमलपोखरीको सीटी सेन्टरमा पनि क्रिसमसको रौनक छाएको थियो । शुक्रबार संयोगचाँहि परिस्थितिले नै के जुराइदियो भने नेवार समुदायले मनाउने यमरी पूणिर्माका साथै ज्यापु दिवस र क्रिसमस एकैदिन पर्न गयो, जसले गर्दा दुबै समुदायले एकैदिन उत्सव मनाए ।
नेवारी र क्रिश्चियन समुदायको मात्रै होइन, किरातीहरुको उधौली पर्व पनि शुक्रबार नै जुर्यो, जसले गर्दा तीनवटा समुदायले एकै दिन सेलिब्रेसन गरे ।
भिडियो
तस्वीरः श्रीधर पौडेल/अनलाइनखबर