७ फागुन, विराटनगर । मोरङमा जारी विराट गोल्डकप फुटबल प्रतियोगिता अन्तर्गत शुक्रबारको खेलमा मोरङ ११ विजयी भएको छ ।
रुपन्देही ११ लाई तीन-एक गोल अन्तरले हराउँदै आयोजक मोरङ ११ ले प्रतियोगितामा विजयी सुरुवात गरेको हो । उपहार पोगको सहयोगमा खेलमा मोरङले अग्रता लिएको थियो ।
पहिलो हाफको ३२ औं मिनेटमा मोरङका प्रकाश बुढाथोकीको प्रहार रुपन्देहीका पिटर सेगुनले क्लियस गर्न लाग्दा आˆनै पोष्टमा गोल हुन पुगेको थियो ।
त्यसयता मोरङले थप दुई गोल गर्न सफल भयो । ४८ औं मिनेटमा दिपक राई मोरङलाई दुई शून्य गोलको अग्रता दिलाए । मोरङका लागि तेस्रो गोल रुपेश केसीले गरे । रुपन्देहीको तर्फबाट शिव श्रेष्ठले पेनाल्टीमार्फत सान्त्वना गोल फर्काए ।
खेलमा मोरङका विजय धिमाल म्यान अफ दि म्याच घोषित भए । प्रतियोगिता अन्तर्गत भोलि जर्ज टेलिग्राफ कलकत्ता र झापा ११ बीच खेल हुनेछ ।
