३ असार, भैरहवा । आर्थिक वर्ष २०७२/७३ को मसान्त महिना लाग्दा समेत रुपन्देहीका विभिन्न कार्यालय र आयोजनाहरुका लागि पप्र्यात बजेट भएपनि खर्च गर्न नसकेको देखिएको छ ।
जिल्लामा आर्थिक वर्ष ०७२/०७३ को लागि चालु र पुुँजीगत तर्फ गरी कुल ९ अर्ब ३६ करोड ९७ लाख ९२ हजार ७ सय १३ रुपैयाँ ५२ पैसा विनियोजन भएको थियो । जसमा चालु र पुँजीगत तर्फको खर्च गरी कुल ६ अर्ब ८५ करोड ५९ लाख ७१ हजार १ सय २६ रुपैयाँ ८६ पैसा निकासा भएको र २ अर्ब ५१ करोड ३८ लाख २१ हजार ५ सय ८६ रुपैयाँ ६६ पैसा खर्च हुन बाँकी रहेको कोष तथा लेखा नियन्त्रक कार्यालय (कोलोनिका) रुपन्देहीले जनाएको छ ।
जिल्लामा पुजिगत तर्फ अर्थात विकास निर्माणका लागि २ अर्ब ९४ करोड ७८ लाख ८६ हजार १ सय ४६ रुपैयाँ बजेट विनियोजन भएपनि जेठ मसान्त सम्म १ अर्ब ७७ करोड ९७ लाख ६९ हजार २ सय ८६ रुपैयाँ ६५ पैसा मात्र खर्च भएको कोष तथा लेखा नियन्त्रक कार्यालयका सहायक प्रमुख शालिकराम पन्थीले बताए ।
जिल्लामा पुँजीगततर्फ अर्थात विकास निर्माणको लागि अब एक महिना भित्र १ अर्ब १६ करोड ८१ लाख १६ हजार ८ सय ५९ रुपैयाँ ३४ पैसा खर्च गर्नुपर्ने देखिन्छ ।
आर्थिक वर्ष सकिन लाग्दा समेत पुजिगतर्फको करिब ५० प्रतिश्त बजेट सदुपयोग हुन नसकेको देखिएको छ । अर्थात जिल्लामा विकास निर्माणका तिव्र गतीमा भएको छैन । विगतका वर्षहरुमा पनि समयमा पुजिगत तर्फको बजेट खर्च अर्थात विकास निर्माणको काम हुन नसक्दा जिल्लामा करोडौ रुपैयाँ बजेट फ्रीज हुदै आएको छ ।
तर हतपतको काम लतपतमा गर्नलाई अधिकांश कार्यालय र आयोजनाहरुले केही रकम खर्च गरेपनि करोडौ रुपैयाँ भने फ्रीज हुने प्रष्ट भएको छ । असारे विकासका काममा हतपतको काम लतपतममा गरी अधिकांश कार्यालय/आयोजनाहरुले अनियमितता समेत गर्ने गरेका छन् ।
कामहरु भइरहेको र रकम मात्र निकासा नभएको हुदाँ पुजिगत तर्फको बजेट बढी यथावत देखिएको कोलेनिका सहायक प्रमुख पन्थी बताउँछन् ।
कोष तथा लेखा नियन्त्रक कार्यालय (कोलोनिका) रुपन्देहीबाट अनलाइनखबरलाई प्राप्त तथ्यांकमा लुम्बिनी परिक्रमा बर्दघाट पालडाँडा त्रिवेणी सडक आयोजना, व्यापारिक मार्ग विस्तार आयोजना -बेलहिया-बुटवल) डिभिजन सडक कार्यालय, जिल्ला विकास सिमतीको कार्यालय, किसानको लागि उन्नत बीउ विजन कार्यक्रम, पश्चिमाञ्चल सिचाँई विकास डिभिजन नं. ६, पर्यटन कार्यालय लगायतले ठुलो बजेठ खर्च गर्न नसकेको देखिएको छ ।
आर्थिक वर्ष २०७२।०७३का लागि लुम्बिनी परिक्रमा बर्दघाट पालडाँडा त्रिवेणी सडक आयोजनाले पाएको ३२ करोड ३० लाख ३५ हजार रुपैयाँ मध्ये जेठ मसान्त सम्म ९ करोड ८४ लाख १० हजार २९ रुपैयाँ मात्र खर्च गरेको छ । अर्थात यो आयोजनाका लागि यतीको रकम बजेट विनियोजन गरिएपनि आयोजनाले काम नगरेको प्रष्ट भएको छ ।
यो आयोजनाले असार महिना भित्रमा २२ करोड ४६ लाख २४ हजार ९ सय ७१ रुपैयाँ खर्च गर्नुपर्ने देखिन्छ । तर एक महिना भित्र यो आयोजनाले यती रकम बराबरको काम गर्न नसक्ने प्रष्ट भएको र रकम फ्रीज हुने पक्का रहेको छ ।
त्यस्तै व्यापारिक मार्ग विस्तार आयोजना -बेलहिया-बुटवल समेत ठुलो रकम खर्च नगरेकोको सुचिमा परेको छ । यो आयोजनाको लागि ४९ करोड ५० लाख रुपैयाँ बजेट विनियोजन भएकोमा जेठ मसान्त सम्म ३७ करोड ६८ लाख ८८ हजार २ सय ९ रुपैयाँ मात्र खर्च गरेको छ । यो आयोजनाले काम गरिरहेपनि असार महिना भित्र करिब १३ करोड रुपैयाँ खर्च गर्नुपर्ने देखिएको छ ।
यस्तै बजेट भएपनि खर्च गर्न नसकेको अर्को कार्यालय हो डिभिजन सडक । यो कार्यालयको लागि ४८ करोड ६८ लाख ३१ हजार रुपैयाँ बजेट विनियोजन भएपनि जेठ मसान्त सम्म यो कार्यालयले ४१ करोड ७७ लाख ५१ हजार ३ सय १३ रुपैयाँ मात्र खर्च गरेको देखिएको छ ।
सडक डिभिजन कार्यालय असार महिना भित्रमा करिब ७ करोड रुपैयाँ खर्च गर्नुपर्ने देखिएको छ । त्यस्तै जिल्ला विकास समितीको कार्यालयले असार महिना भित्र करिब ६ करोड रुपैयाँ खर्च गर्नुपर्ने देखिएको छ ।
किसानको लागि उन्नत बीउ विजन कार्यक्रम आयोजनाले काम गर्न नसकेको प्रष्ट भएको छ । यो आयोजनाको लागि ११ करोड १६ लाख ९० हजार रुपैयाँ बजेट विनियोजन भएपनि यो आयोजनाले जेठ मसान्त सम्ममा मात्र ६ करोड ६२ लाख ८९ हजार ८ सय ९४ रुपैयाँ खर्च गरेको देखिएको । यो आयोजनाको पनि रकम फ्रीज हुने देखिएको छ ।
त्यस्तै पश्चिमाञ्चल सिचाँई विकास डिभिजन नं. ६ को कार्यालयले यही असार महिना भित्र करिब ४ करोड रुपैयाँ, पर्यटन कार्यालयले करिब साढे ५ करोड, भुमिगत जल सिचाई विकास डिभिजन कार्यालयले ५ करोड, भैरहवा भन्सार कार्यालयले करिब ६ करोड, जनताको तटबन्ध कार्यक्रम फिल्ड कार्यालयले करिब ४ करोड, जिल्ला वन कार्यालयले १ करोड, भुमिगत जलश्रोत विकास समिति शाखा कार्यालयले साढे २ करोड रुपैयाँ खर्च गर्नुपर्ने देखिएको छ ।
यी हुन् बढी बजेट खर्च गर्न नसकेका रुपन्देहीका कार्यालय/आयोजना
कार्यालय/योजनाको नाम | बजेट | खर्च (रुपैयाँ) |
---|---|---|
लुम्बिनी परिक्रमा बर्दघाट पालडाँडा त्रिवेणी सडक | ३२,३०,३५,००० | ९,८४,१०,०२९ |
व्यापारिक मार्ग विस्तार आयोजना | ४९,५०,००,००० | ३७,६८,८८,२०९ |
डिभिजन सडक कार्यालय | ४८,६८,३१,००० | ४१,७७,५१,३१३ |
जिल्ला विकास सिमतीको कार्यालय | २०,७७,२६,००० | १४,९८,००,९८७ |
किसानको लागि उन्नत विउ विजन कार्यक्रम | १,१६,९०,००० | ६,६२,८९,८९४ |
पश्चिमाञ्चल सिचाँई विकास डिभिजन नं. ६ | ९,९८,३७,००० | ६,०१,०९,४७२ |
पर्यटन कार्यालय | ९,९८,००,००० | ५,७३,२४,५९९ |
भुमिगत जल सिचाई विकास डिभिजन | ७,८१,००,००० | २,८८,०५,८३० |
भैरहवा भन्सार कार्यालय | ७,३१,००,००० | १,६९,८४,४४३ |
जनताको तटबन्ध कार्यक्रम फिल्ड कार्यालय | ६,५०,००,००० | २,८१,९२,५५५.६३ |
जिल्ला वन कार्यालय | ३,११,९३,००० | १,९५,८९,९१२ |
भुमिगत जलश्रोत विकास समिती शाखा कार्यालय | २,९९,१२,००० | ५२,७८,६६५ |
जिल्ला भु संरक्षण कार्यालय | २,३८,५०,००० | १,७८,३४,९०२ |
दंगा नियन्त्रण प्रहरी गण | २,५१,८५,००० | १,७१,७४,००४.६८ |
जिल्ला प्राविधिक कार्यालय | १,६८,२०,००० | ५६,१५,४०८ |
जिल्ला प्रशसान कार्यालय | १,२५,१२,३०० | ३१,७८,१०५ |
लुम्बिनी यातायात व्यवस्था कार्यालय | १०,५०,००० | ६,४१,४७५ |
राष्ट्रिय गहुबाली अनुसन्धान कार्यक्रम | १,०१,७५,००० | ४०,५९,३०७.३७ |
राष्ट्रिय अनुसन्धान कार्यालय | ३५,५०,००० | १२,२८,१९७ |
राजश्व अनुसन्धान कार्यालय | ३४,५०,००० | २,२२,४८९ |
जिल्ला हुलाक कार्यालय | २२,४५,००० | ५,४५,३५७.४६ |