७ साउन, नवलपरासी । रातभर परेको पानीले नवलपरासीको सदरमुकाम परासी जलमग्न भएको छ ।
डुबानका कारण स्थानीयलाई हिडडुलमा समेत समस्या भएको छ । नवलपरासीका प्रमुख जिल्ला अधिकारी महादेव पन्तले सदरमुकाम परासी डुबानमा परेको बताए ।
पन्तका अनुसार डुबानले मानवीय क्षति भने भएको छैन । भौतिक सम्पत्तिको क्षति भएको भएपनि यकिन विवरण भने नआएको उनले बताए ।
सदरमुकाम परासी भएर बग्ने झराही खोलामा ठूलो बाढी आएको छ । सदरमुकाम परासीमा पानीको निकास नभएका कारण परासीको मुख्य चोकका साथै सडक छेउछाउको भूभाग डुबानमा परेको छ ।
त्यसैगरी नवलपरासीको बेनिमणिपुर ६ पनि डुबानमा परेको छ ।
बेनिमणिपुर ६ को कोल्टानी, बैरेनी, खयरघारी गाउँ पुरै डुबानमा परेको छ । बाढीले बाख्रा तथा कुखुराहरु बगाएको स्थानीयले बताएका छन् । इलाका प्रहरी कार्यालय नवलपुरका प्रहरी नावय उपरीक्षक राजेश थापाले डुबानमा परेको खबर आएपछि घटना स्थलमा टोली परिचालन गरेको बताए ।
त्यसैगरी नवलपरासीको वेनिमणिपुर ३ को बालुचिरा गाउंमा १५/१७ घर डुबानमा परेको स्थानीय सालिकराम भुसालले बताए ।
उता नवलपरासीको हरपुर क्षेत्र पनि डुबानमा परेको छ ।
त्यसैगरी विनयी खोला लगायतका अन्य खोलाहरुमा आएको बाढीका कारण दुम्किबासबाट सर्दी चल्ने भित्री सडक अवरुद्ध भएको छ ।
त्यसैगरी लगातारको वर्षापछि झरेको ससाना पहिरोको कारण नवलपरासीको दलदलेबाट डेढगाउं बुलिङ्गटार चल्ने भित्री सडक अवरुद्ध भएको छ ।
