१५ कात्तिक, काठमाडौं । नेपाल बैंकर्स संघका अध्यक्षसमेत रहेका एनएमबी बैंकका प्रमुख कार्यकारी अधिकृत आगामी तीन महिनापछि बैंकिङ क्षेत्रबाट बाहिरिँदै छन् । आगामी मंसिर ९ गते उनको कार्यकाल सकिँदै छ । तर, उनकै आग्रहमा तीन महिना कार्यकाल थपिएको छ ।
आफू एउटा ग्लोबल कन्फ्रेन्स गर्ने तयारीमा रहेकाले आफ्नै आग्रहमा कार्यकाल थपिएको उनले बताए । जसअनुसार अब उनले आउँदो फागुनसम्म एनएमबीकेा सीइओ भएर काम गर्नेछन् ।
पौडेलको अग्रसरतामा आगामी मार्च ७ देखि १० गतेसम्म ग्लोबल अलाइन्स फर बैंकिङ अन भ्यालुज कन्फ्रेन्स नेपालमा हुँदैछ ।
पौडेलले ३१ वर्षअघि तत्कालीन गि्रनलेज बैंक (हालको स्टान्डर्ड चार्टर्ड बैंक) बाट बैंकिङ करियर सुरु गरेका थिए । फाइनान्स कम्पनी हुँदादेखि नै उनी एनएमबीको सीइओ थिए । एनएमबीको स्थापना भएको १७ वर्ष भयो ।
यति लामो समय सक्रिय बैंकिङ गरेका उनी अब के गर्छन् त ? अनलाइनखबरको जिज्ञासामा पौडेलले भने, ‘म वित्तीय क्षेत्रमै रहन्छु तर बैंकरको रुपमा होइन ।’
वित्तीय समावेसीता र वित्तीय पहुँच विस्तारमा आफू सक्रिय भएर लाग्ने उनले बताए । ‘जागिर सकिएको ५/६ महिना केहि पनि काम गर्दिनँ । त्यसपछि वित्तीय क्षेत्रकै विकासका लागि समाज सेवाको दृष्टिकोणले काम गर्छु,’ उनले भने ।
वित्तीय क्षेत्रको सुधार कार्यक्रममा पनि आफ्नो अनुभव खर्च गर्न आफू तयार रहेको उनले बताए ।
उनले भने, ‘नेपालको वित्तीय क्षेत्रमा सुधार गर्नुपर्ने केही विषयहरु छन्, जो बैंकरकोरुपमा नभई विज्ञकोरुपमा पनि गर्न सकिने प्रशस्त ठाउँहरु छन् ।’
यो पनि पढ्नुहोस्