विप्लवको बन्दले सर्बसाधारणलाई सास्ती

२८ कात्तिक, काठमाडौं । नेत्रविक्रम चन्द ‘विप्लव’ नेतृत्वको नेकपा माओवादीले आह्वान गरेको बन्दले सर्बसाधारण मर्कामा परेका छन् । सार्बजनिक गाडीहरु नचल्दा कष्टपूर्ण यात्रा गर्नुपर्ने बाध्यता छ ।

सधैंजसो गाडीको जाम हुने काठमाडौं उपत्यकाका सडकहरु आज सुनसान छन् । गाडी चढ्न नपाएपछि आफ्ना गह्रुंगा झोला बोकेर कष्टपूर्ण तरिकाले हिँड्न सर्बसाधारण बाध्य छन् ।

चार पांग्रे गाडीहरुको तुलनामा मोटरसाइकलहरु भने चलिरहेका छन् । आफूसँग सवारी साधन नभएकाहरु र हिँडेर गन्तव्यमा पुग्न नसक्नेहरुले रिक्साको सहारा लिएका छन् ।

गाडी चढ्न नपाएर भक्तपुरबाट पैदल यात्रा गर्दै नयाँबानेश्वरसम्म आइपुगेका एक व्यक्ति भन्दै थिए– जनताको लागि राजनीति गर्छु भन्छन् तर हामी जनतालाई नै दुःख दिन्छन् ।