२० मंसिर, काठमाडौं । उपत्यकाबाट बाहिरिने सबै पेट्रोलियम ट्यांकरहरुको अनुगमन सुरु भएको छ । उपत्यकामा डिजेलको माग र खपत ह्वात्तै बढेपछि ट्यांकरबाटै तेलको कालोबजारी भएको हुनसक्ने अशंकामा अनुगमन सुरु गरिएको आपूर्ति विभागका महानिर्देशक गोकुल धितालले अनलाइनखबरलाई जानकारी दिए ।
उपत्यका छाड्ने सबै ट्यांकरमा ग्रेज लगाएर तेल भए/नभएर हेर्न सुरु गरिएको हो । राजधानीमा लोडसेडिङ हुन छाडेपछि नेपाल आयल निगमले तेलको माग घट्ने प्रक्षेपण गरेपनि बजारमा मागको दर दोब्बर भएको छ र यसैका आधारमा तेलमा कालोबजारी भएको ठहर सरकारले गरेको छ ।
नेपालमाभन्दा भारतमा तेलको मूल्य महंगो भएकाले ट्यांकरहरुले तेल भारत नै पुर्याएर बिक्री गरेको ठअर आपूर्ति मन्त्रालयको छ । नेपालमा तेल सस्तो भएकै कारण नेपाली बजारबाट तेल लगेर भारतमा कालोबजारी गर्ने क्रम तीब्र भएको दावी आयल निगमको पनि छ ।
‘अहिले थानकोटमा विभाग र आयल निगमबाट खटिएका अधिकृतहरुले काठमाडौंमा तेल ल्याएर फर्किने ट्यांकी चेक जाँच गर्दैछन्’ महानिर्देशक धितालले भने,’२४ नै घण्टा सबै ट्यांकरलाई परीक्षण गरेरमात्रै पठाउन प्रहरीलाई पनि निर्देशन दिइएको छ ।’
उनकाअनुसार नागढुंगमा आइतबारदेखि टोलीले प्रहरीको सहयोगमा अनुगमन थालेको हो । ल्याएको सबै तेल नखन्याएर सेटिङमा भारत लगेर बेच्ने गरिएको दावी आयल निगमका अधिकारी पनि गर्छन् ।
नेपाल आयल निगमले वितरणका लागि दिएको तेल कतिपय पम्पधनीले सीधै सीमा क्षेत्रमा पुर्याउने गरेको आरोप उनीहरु लगाउँछन् ।
डिजेलको माग अप्रत्याशित
दैनिक साढे ५ सयदेखि ८ सय किलोलिटरसम्म डिजेलको माग हुने काठमाडौंमा अहिले दैनिक माग १६ देखि १८ सय किलोलिटरसम्म पुगेको आयल निगमे जनाएको छ ।
पेट्रोल पनि दैनिक ४ देखि ६ सय किलोलिटरसम्म माग छ । पेट्रोलको माग धानिरहेको आयल निगमलाई डिजेलको माग धान्न हम्मेहम्मे परेको छ ।
उपत्यकाबाहिर पनि तेलको माग उच्च छ । भारतीय सीमा क्षेत्रमा त झन तेलको माग अप्रत्याशित रुपमा उकालो लागेको छ । समान्यतयाः हिँउद सुरु भएपछि नेपालमा तेलको माग बढ्छ ।
लोडसेडिङ कम भएकै समयमा तेलको माग दोब्बर हुँदा आयल निगमका अधिकारी अचम्मित भएका छन् । देशमा कुल खपत हुने इन्धनको ३० देखि ४० प्रतिशत हिस्सा उर्जा अर्थात विद्युत उत्पादनमा खर्च हुन्छ ।
तर, जेनेरेटर चलाउनका लागि अहिले तेलको खपत निकै न्युन छ । यस्तो बेलामा पनि मागको उच्चवृद्धि भएपछि आयल निगमका अधिकारी कारण खोज्नतिर लागेका थिए।
पम्पमा पनि अनुगमन
तेलको कालोबजारी विरुद्ध खटिएको अनुगमन टोलीले ५ सय लिटरभन्दा बढी डिजेल लैजाने पम्पहरुमा पनि अनुगमन थालेका छन् । पम्पहरुबाटै पनि तेलको काालेबजारी भएको सूचना सरकारलाई प्राप्त भएको छ ।
‘अब उपत्यकाबाट डिजेल लगेर भारतमा बेच्ने क्रम रोकिन्छ’ धितालले भने,’ल्याएको तल पनि सबै नखन्याइ उतै लैजाँदा बजारमा डिजेलको माग असामान्य भएको ठहर गर्दै अनुगमनका लागि हिँडेका हौं ।’
प्रतिक्रिया 4