१८ पुस, काठमाडौं । दलालसँगको साँठगाँठमा नक्कली जग्गाधनी खडा गरी जग्गा पास गरेको आरोपमा प्रहरीको अनुसन्धान व्यूरोले मालपोत कार्यालय ललितपुरका शाखा अधिकृत मिनबहादुर भट्टराईलाई पक्राउ गरेको छ ।
प्रहरीका अनुसार आरोपी भट्टराईले २०६६ सालमा काठमाडौं मालपोत कार्यालयमा कार्यरत रहँदा चितवन भण्डाराका लोकेन्द्रराज पाठकको नाममा रहेको जग्गा किर्ते गरी इटहरीका देवेन्द्र थापा र झापाका नगेन्द्र कार्कीलाई १ लाखमा दिलाएका थिए ।
झापाका नगेन्द्र कार्कीले जग्गाधनी लोकेन्द्रको भतिजा नातापर्ने जीवनराज पाठकको नाममा किर्ते नागरिकता बनाएर जग्गा पास गरेका थिए । यी दुईलाई पनि प्रहरीले पक्राउ गरेको छ ।
उनीहरुले मालपोत शाखा अधिकृत भट्टराईसँगको मिलेमतोमा नक्कली जग्गाधनी खडा गरी जग्गा हात पार्न सफल भएको प्रहरीको दावी छ ।
जग्गा हात पारेलगत्तै थापा र कार्कीले नेचुरल फ्लाओर एण्ड हर्वल कम्पनीको नाममा ४९ लाखमा जग्गा बेचेको अनुसन्धानबाट खुलेको छ ।
२०६६ सालमै हर्वल कम्पनीले हिमालयन बैंकमा सोही जग्गा धितो राखेर ५ करोड ऋण लिएको र २०६९ सालमा हिमालयन बैंकबाट धितो सारेर प्राइम बैंकबाट ८ करोड ऋण लिएको प्रहरीले जनाएको छ ।
खोटाङ खल्लेका भट्टराई अहिले जिल्ला मालपोत कार्यालयमा कार्यरत छन् ।
प्रतिक्रिया 4