२४ पुस, काठमाडौं । काठमाडौंको नक्शालमा निर्माणाधीन एक होटलको भवनसँगैको सडक भासिएको छ । घटना भयानक भएपनि त्यसले कुनै ठूलो क्षति भने नभएको प्रहरीले जनाएको छ ।
सडकको आधा भाग नै टावरको निर्माणका लागि तयार पारिएको जगमा भासिएर खसेको छ । आइतबार बिहान ६ बजे भएको घटनामा कुनै मानवीय क्षति भने नभएको महानगरीय प्रहरी वृत्त कमलपोखरीले जनाएको छ ।
तर, निर्माणाधीन होटल छेउँको सडक भासिँदा नक्साल भगवती-बालमन्दिर सडकखण्डमा सवारी आवत-जावत रोकिएको छ । प्रहरीले सडक भासिएको क्षेत्र नजिक सर्वसाधारणलाई जान पनि दिएको छैन ।
त्यहाँ भासिएको सडक हेर्नेहरुको भीड लागेको छ । प्रहरी सुरक्षामा खटिएको छ ।