२३ फागुन, काठमाडौं । स्थानीय तह पुनर्संरचना आयोगका सदस्य सुनिल रञ्जन सिंहले राजीनामा दिएका छन् ।
सरकारले आयोगको सिफरिसलाई संशोधन गर्दै स्थानीय तहको संख्या ७४४ बनाउने निर्णय गरेकै भोलिपल्ट सिंहले प्रधानमन्त्री समक्ष राजीनामा दिएका हुन् ।
सरकारले आयोगको सिफारिस समयमै लागू नगरेका कारण विशेष, संरक्षित र स्वायत्त क्षेत्रको संख्या र सीमा निर्धारण हुन नसकेको र आयोगलाई पन्छाएर संख्या बढाएको सिंहको आरोप छ ।
स्थानीय विकासमन्त्रीमार्फत प्रधानमन्त्रीसमक्ष बुझाएको राजीनामा पत्रमा सिंहले आयोग कायमै रहँदा रहँदै आयोगलाई पाई सरकारले गठन गरेको कार्यदलको प्रतिवेदन लगायतका कार्यले संवैधानिक अधिकारमाथि नै हनन भएको बताएका छन् ।
सरकारले आइतबार मात्र स्थानीय तहको संख्या ७१९ बाट बढाएर ७४४ बनाएको थियो ।
स्थानीय तह पुनर्संरचना गर्न बालानन्द पौडेलको नेतृत्वमा बनेको आयोगको कार्यकाल संविधानमा नै एक वर्ष तोकिएको छ र, यो म्याद फागुन मसान्तसम्म मात्र छ । तर, विशेष, संरक्षित र स्वायत्त क्षेत्र निर्धारण हुन सकेको छैन ।
प्रतिक्रिया 4