अनुप विक्रम शाही, सन्ध्या केसी, विनोद न्यौपाने, इशान ढकाल, दिपक पहाडी, रेसु तामाङ, किरण लाकौलको मुख्य भूमिका रहेको चलचित्र ‘कमलेको बिहे’को ट्रेलर, फस्टलुक र एउटा गीत सार्वजनिक गरिएको छ ।
काठमाण्डौमा आयोजना गरिएको पत्रकार सम्मेलनमा चलचित्रका कलाकार, प्राविधिक र निर्माणपक्षको उपस्थितीमा प्रदर्शन मिति तय नगरिएको चलचित्रको प्रचार सामाग्री बजारमा ल्याइएको हो ।
‘स्वर’ डेब्यू निर्देशक प्रसन्न पौडेल निर्देशित यो चलचित्रको शिर्ष भूमिकामा नायक अनुपविक्रम शाही देखिएका छन् । तर, चलचित्रको पहिलो पत्रकार सम्मेलनमा उनी नै उपस्थित थिएनन् । अनुप आउँदै गरेको जानकारी पत्रकार सम्मेलनमा दिइएपनि कार्यक्रमको पुरा अवधी उनी हलमा आइपुगेनन् । यो चलचित्रमा अनुपको विल्कुल भिन्न गेटअप देख्न सकिन्छ ।
चलचित्रमा ‘चमेली’को भूमिकामा देखिएकी नव-नायिका सन्ध्या केसी भने पत्रकार सम्मेलनमा उपस्थित थिइन् । चलचित्रमा साधारण यूवतीको भूमिकामा देखिएकी सन्ध्या कार्यक्रममा भने बोल्ड अवतारमा पुगेकी थिइन् ।
चलचित्रमा महेश दवाडीको कथा, पटकथा तथा संवाद, विदुर पाण्डेको छायांकन, सम्राट बस्नेतको एक्सन, दिपकमान सिंहको कोरियोग्राफी, तारा थापाको सम्पादन छ । चलचित्रमा सरिता लामाको लगानी छ भने दिपक बिष्ट यसका कार्यकारी निर्माता हुन् । सुनिल बिष्ट र मिलन लामा चलचित्रका सह-निर्माता हुन् ।