विकास समितिको निर्देशनः १२० मिटरको दुरीमा जेब्रा क्रसिङ राख्नू, सडक बत्ति जडान गर्नू

२६ जेठ, काठमाडौं । संसदको विकास समितिले १२० मिटरको दुरीमा जेब्रा क्रसिङ राख्न निर्देशन दिएको छ । साथै सडक पेटी नभएको ठाउँमा बनाउन पनि भनेको छ ।

पछिल्लो पटक जेब्रा क्रसिङ बाहेकका अन्य स्थानबाट बाटो काट्ने पैदल यात्रुलाई २०० रुपैयाँ जरिवाना गर्ने वा ३ घन्टा थुन्ने गरेकोमा ट्राफिक प्रहरीको चर्को आलोचना भइरहेको छ । आवश्यकता अनुसार जेब्रा क्रसिङ नै नभएको र पर्याप्त जनचेतना नजगाई कारबाही थालिएकाले ट्राफिकको आलोचना भएको हो ।

विकास समितिको शुक्रबारको बैठकले उपत्यकाको सडकमा १२० मिटरमा जेब्रा क्रसिङ राख्ने गरी ७ दिनभित्र मापदण्ड बनाउन र २ महिनाभित्र कार्यान्वयन गरिसक्न सडक विभाग, यातायात व्यवस्था विभाग र ट्राफिक प्रहरी निर्देशन दिएको छ ।

साथै पैदलयात्रीहरुलाई सडक अनुशासन पालना गरेको कारबाही गर्नुपूर्व पर्याप्त जनचेतना जगाउन भनेको छ । साथै सात दिनभित्र सडक अनुशासन निर्देशका तथा सडक र सडकपेटी प्रयोग गर्ने निर्देशक बनाएर कार्यान्वयन गर्न भनेको छ ।

विकास समितिले ट्राफिक बत्ति पुनः सुचारु गर्ने प्रक्रिया छिटो निष्कर्षमा पुर्‍याउन भनेको छ । यदि यो प्रक्रियाले समय लिने भए आफ्नो स्रोत वा वैकल्पिक व्यवस्थापनबाट ५ महिनाभित्र ट्राफिक बत्ति पुनः सुचारु गर्न निर्देशन दिएको छ ।

संसदको विकास समितिको शुक्रबारको बैठकले ट्राफिक नियम उल्लंघन गरेवापत गरिने जरिवानाको १५ प्रतिशत रकम ट्राफिक प्रहरीलाई नदिन पनि निर्देशन दिएको छ । समितिले यस्तो भत्ता उपलब्ध गराउनुको साटो ट्राफिक प्रहरीलाई जोखिम तथा प्रोत्साहन भत्ता उपलब्ध गराउन विकास समितिले निर्देशन दिएको छ ।

महानगरीय ट्राफिक प्रहरीका प्रवक्ता लोकेन्द्र मल्लले भने करिब २ वर्षदेखि यो रकम नपाएको बताए ।

ट्राफिक प्रहरीले पनि विकास समितिको निर्देशन सही विकल्प नभएको बताएको छ । ट्राफिक प्रवक्ता मल्लले अनलाइनखबरसँग भने, ‘यो भत्ताको कारण हामीप्रति जनताको नकारात्मक धारणा रहँदै आएको छ । हामीले पनि यो हटाउन आग्रह गर्दै आएका छौं । बरु यसको साटो प्रोत्साहन भत्ता उपलब्ध गराउन उचित हुन्छ ।’