बिहीबार, २ कार्तिक, २०७४
OnlineKhabar.com

मेलम्चीको सुरुङ पुस मध्यमा ‘ब्रेक थ्रू’

चैतभित्र उपत्यकामा पानी ल्याउन विकास समितिको निर्देशन

अनलाइनखबर

२६ असोज, काठमाडौं । मेलम्ची खानेपानी आयोजनाको सुरुङ खन्ने काम आगामी पुस महिनाभित्र सकिने दावी गरिएको छ । २७.५ किलोमिटर लामो सुरुङमध्ये हाल १५ सय मिटर सुरुङ खन्न मात्रै बाँकी छ । पुस महिनाभित्र सक्ने लक्ष्यसहित दुई स्थानबाट खन्ने काम भइरहेको छ ।

बिहीबार बसेको विकास समितिको बैठकमा बोल्दै आयोजना प्रमुख रामचन्द्र देवकोटाले अम्बाथान-ग्यालथुङ सुरुङको मंसिर र सिन्धु-ग्यालथुमको सुरुङको पुुस मध्यमा ‘ब्रेक थ्रू’ हुने जानकारी दिए ।

इटालियन ठेकेदार सीएमसीसँग गरिएको ठेक्का सम्झौताको म्याद आगामी चैतमा सकिँदैछ । उनले भने, ‘यही गतिमा काम अघि बढाउने हो भने पुस मध्यमा सुरुङ खन्ने काम सकेर ठेक्का सम्झौताको म्याद नसकिँदै मेलम्चीको पानी काठमाडौंमा आउनेछ ।’

सुन्दरीजलदेखि सिन्धुसम्मको करिब ९ किलोमिटर सुरुङ खन्ने काम ९ महिनाअघि सकिएको छ जसमा अहिले ढलान गर्ने काम भइरहेको छ ।

मेलम्ची खानेपानी आयोजना निर्माण सम्पन्न भएमा काठमाडौं उपत्यकामा दैनिक १७ करोड लिटर पानी आउनेछ । उपत्यकामा अहिले दैनिक ३८ करोड लिटर पानी आवश्यक भए पनि १२ करोड लिटर मात्र आपूर्ति हुँदै आएको छ । वर्षातको समयमा भने १७ करोड लिटरसम्म आपूर्ति हुने गरेको देखिन्छ ।

मेलम्ची आयोजना आएसँगै उपत्यकामा हरेक समय १७ करोड लिटर थप पानी आपूर्ति हुनेछ ।

मेलम्चीबाट पहिलो चरणमा दैनिक १७ करोड लिटर पानी आउनेछ । साथै यही सुरुङमा सन् २०२२ सम्ममा याङ्री र लार्के खोलाको पानी मिसाएर दैनिक ५२ करोड लिटर पानी ल्याउने सरकारको योजना छ ।

बिहीबार बसेको बिकास समितिको बैठकले यही वर्षभित्र मेलम्ची आयोजनालाई सबै काम सक्न निर्देशन दिएको छ । ‘पटक-पटक निर्माण सम्पन्न गर्ने म्याद सारियो अब त्यसो नहोस्,’ समितिका सभापति रविन्द्र अधिकारीले भने, ‘यही वर्ष भित्रै काठमाडौंमा पानी ल्याउने गरी काम अघि बढाउनुहोस् ।’

२०७४ असोज २६ गते १५:४५ मा प्रकाशित (२०७४ असोज २७ गते १४:०५मा अद्यावधिक गरिएको)

सम्बन्धित शीर्षकहरु

अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

मुख्य खबरहरु

यसमा तपाइको मत




फेसबुकबाट तपाईको प्रतिक्रिया

Also you may like this