२०७४ फागुन ८ गते १७:४१ 
८ फागुन, धनगढी । धनगढीमा बुधबारदेखि सुरु हुने प्रधानमन्त्री कप महिला राष्ट्रिय क्रिकेट प्रतियोगिताकोे सम्पूर्ण तयारी पूरा भएको छ ।
कैलाली जिल्ला खेलकुद विकास समितिले मगलबार पत्रकार सम्मेलन गरी तयारी सकिएको जानकारी दिएको हो । पहिलो पटक धनगढीमा हुने प्रतियोगिता फागुन १३ गतेसम्म सञ्चालन हुने छ ।
राष्ट्रिय खेलकुद परिषद्को संयोजकत्व तथा कैलाली जिल्ला खेलकुद विकास समितिको आयोजनामा हुने प्रतियोगितामा साविकका पाँच वटै विकास क्षेत्र तथा एउटा विभागीय टिम सशस्त्र प्रहरी बल (एपीएफ) गरी छ वटा टिमको सहभागिता रहने प्रतियोगिताका संयोजक बाबुराजा श्रेष्ठले जानकारी दिए ।
बुधबार बिहान प्रतियोगिताको उद्घाटन हुने आयोजकले जानकारी दिएको छ । प्रतियोगिताको राष्ट्रिय खेलकुद परिषद्का सदस्य सचिव केशव विष्टले उद्घाटन गर्नेछन् ।
उद्घाटन खेलमा सुदूरपश्चिम र पश्चिमाञ्चल भिड्नेछन । सहभागी ६ टोलीहरुलाई दुई समूहमा विभाजन गरिएको छ । समूहका विजेता र उपविजेताले सेमिफाइनलमा स्थान पाउनेछन् ।
प्रतियोगिताको बिजेताले पाँच लाख तथा उपविजेताले दुई लाख रुपैयाँ पुरस्कार प्राप्त गर्ने उनले बताए ।
त्यस्तै, वमन अफ द सिरिजलाई १० हजार र अन्य चार विधाका उत्कृष्ट खेलाडीलाई जनही पाँच हजार रुपैयाँ पुरस्कार प्रदान गरिने छ ।
धनगढीको फाप्ला मैदानमा हुने प्रतियोगिताको लागि सगरमाथा सिमेन्ट मुख्य प्रायोजक रहेको छ । प्रतियोगितामा झण्डै साढे ३८ लाख खर्च हुने अनुमान गरिएको छ ।
प्रतिक्रिया 4