नायिका पूजा शर्मा र निर्देशक सुदर्शन थापाले निर्माण गरेको दोश्रो चलचित्र ‘रामकहानी’को पहिलो गीत रिलिज गरिएको छ । अर्जुन पोखरेलको शब्द तथा संगीत रहेको यो गीतमा सुगम पोखरेल र अन्जु पन्तको आवाज छ ।
‘तिम्रो लागि म छु यो दुनियाँ छोडिदेउ’ बोलको गीतले दर्शकको मन जित्ने विश्वास गरिएको छ । गीतमा चलचित्रका मुख्य नायिका पूजा शर्मा र नायक आकाश श्रेष्ठलाई फिचरिङ गरिएको छ । साथमा, चलचित्रका अन्य मुख्य कलाकारहरु केदार घिमिरे, जितु नेपाल, विल्सन विक्रम राइलाई पनि गीतको भिडियोमा देख्न सकिन्छ ।
भदौ २२ गतेबाट रिलिज हुने चलचित्रको यो गीतको छायांकन धुर्मुस–सुन्तलीद्वारा निर्मित सन्तपुर वस्तिमा गरिएको छ । कोरियोग्राफर कविराज गहतराजले अत्यधिक संख्यामा कोरस डान्सर प्रयोग गरेका छन् । आकाश र पुजाको केमेस्ट्री जमेको छ । सौरभ लामाले भिडियोलाई आकर्षक तरिकाले खिचेका छन् । सुदर्शन थापाको चलचित्रमा कथा तथा निर्देशन छ ।
