१२ जेठ, गोरखा । गोरखामा सरकारी कार्यालयका सवारी साधान जनप्रतिनिधीहरुले बढी दुरुपयोग गर्ने गरेको पाइएको छ ।
सार्वजनिक बिदाको दिन अनुमति नलिइ सरकारी सवारी चलाउने मध्ये अधिकांश जनप्रतिनिधि रहेको जिल्ला प्रहरी कार्यालय गोरखाले जनाएको छ ।
एक महिनाको अवधिमा २२ वटा सरकारी सवारी नियन्त्रणमा लिइएको जिल्ला ट्राफिक इन्चार्ज दयाराम पौडेलले बताए । ‘सार्वजनिक बिदाको दिन अनुमति नलिई चलेका १८ वटा मोटरसाइकल, एउटा स्कुटर र दुई वटा गाडी नियन्त्रणमा लिएका छौं’ पौडेलले भने, ‘दुरुपयोग गर्नेमा बढी वडा अध्यक्षहरु हुनुहुन्छ ।’
दुरुपयोग भएका सवारीहरु शहरी आवास तथा भवन डिभिजन कार्यालय र वडा कार्यालयको रहेको प्रहरीको भनाइ छ ।
सरकारी सवारीको दुरुपयोग भएको गुनासो बढ्न थालेपछि चेकजाँचमा कडाइ गरिएको जिल्ला प्रहरी कार्यालय गोरखाका प्रमुख एसपी बिमल बस्नेतले बताए ।
‘बिभिन्न नाकामा चेकजाँच कडा पारेका छौं, सार्वजनिक विदाको दिन सरकारी सवारी चलाएको भेटेमा पास माग्छौं, पास नभएमा सवारी नियन्त्रणमा लिने गरेका छौं’ उनले भने ।
नियन्त्रणमा लिइएको सवारी विदा सकिएपछि छाड्ने गरिएको छ ।
सार्वजनिक विदाको दिन पास लिएर मात्र सवारी चलाउन सबै कार्यालय प्रमुखहरुलाइ निर्देशन दिइसकेको प्रमुख जिल्ला अधिकारी नारायण प्रसाद भट्टराइले बताए । ‘बिदाका दिन बिभागीय काममा जानुपर्दा अनुमति लिएर मात्र जाने भन्ने निर्णय कार्यालय प्रमुखहरुको बैठकमा गरिसकेका छौं’ प्रजिअ भट्टराइले भने, ‘विना अनुमति र विना काम बिदाको दिन सवारी चलाउन पाइँदैन ।’
जनप्रतिनिधिहरुले पनि स्थानीय तहले उपलब्ध गराएको पास लिएर मात्र सार्वजनिक बिदाका दिन सवारी चलाउनुपर्ने प्रजिअ भट्टराइले बताए ।