१८ असार, काठमाडौं । नेपाली कांग्रेसका नेता कृष्णप्रसाद सिटौलाले सभापति शेरबहादुर देउवाले पार्टीलाई एकतावद्ध बनाउन नचाहेको आरोप लगाएका छन् ।
नेता सिटौलाले सभापति देउवाले पार्टीभित्र न्याय नगरेको भन्दै आक्रोशसमेत व्यक्त गरे । उनले सभापति देउवाले पार्टीका नेताकार्यकर्तालाई समान व्यबहार नगरेको गुनासो समेत गरेका छन् ।
गिरिजाप्रसाद कोइरालाको जन्मजयन्तिको अवसरमा सोमबार काठमाडौंमा आयोजित कार्यक्रममा बोल्दै उनले सभापति देउवालाई पार्टीलाई एकतावद्ध बनाएर लैजाने दायित्व पूरा गर्न आग्रह गरेका छन् ।
नेता सिटौलाले कोइरालाले सिंगो मुलुकलाई एकतावद्ध बनाएको भन्दै देउवालाई पनि पार्टीलाई एकतावद्ध बनाउन सुझाव दिए ।
उनले जनताको समृद्धिको चाहनालाई पूरा गर्न कांग्रेसभित्र एकता हुनुको विकल्प नरहेको पनि दोहोर्याए ।
कार्यक्रममा नेता सिटौलाले मुलुकमा गणतन्त्र स्थापनाका लागि गिरिजाप्रसाद कोइरालाले खेलेको भूमिकाको बारेमा चर्चा गरेका थिए ।