२५ असार, काठमाडौं । थाइल्याण्डको एक गुफामा बसेका १२ बालकमध्ये सोमबार चार जनालाई सुरक्षित रुपमा बाहिर निकालिएको छ । चार जनाको आइतबार नै उद्दार भएको थियो ।
गुफाभित्र रहेका चार बालक र उनीहरुका फुटबल प्रशिक्षकलाई उद्दार गर्ने क्रम चलिरहेको छ ।
उनीहरुको उद्दार थाइल्याण्डले त आफ्नो सबै शक्ति लगाएको छ नै, ४० भन्दा बढी देशले पनि काम गरेका छन् । विश्वभरका सञ्चार माध्यमहरुले यो उद्दार प्रयासका एक एक खबरलाई उच्च प्राथमिकताका साथ प्रसारण गरिरहेका छन् ।
तर, यो सबै हेरिरहँदा सबैको मन प्रश्न उठ्छ, फुटबल खेल्न गएका उनीहरु गुफामा गएका थिए किन ?
२३ जुनको स्थानीय समयअनुसार १० बजे यो टिम फुटबलको अभ्यास गर्न पुगेको थियो । १०ः४२ मा फुटबल प्रशिक्षकले अभ्यासको भिडियो फेसबुकमा पोष्ट पनि गरेका छन् ।
दिउँसो करिव ३ बजे १३ साइकल गुफामा प्रवेश गरेको त्यहाँको राष्ट्रिय निकुञ्जका कर्मचारीहरुले देखेका थिए ।
फुटबल खेल्न गएका छोराहरु नआएपछि अभिभावकले सोधेखोजी गरेका थिए । शनिबार राति माएसई पुलिसले बच्चाहरु हराएको बतायो र २४ जुनबाट खोजी सुरु भयो ।
एक रिपोर्ट अनुसार फुटबल अभ्यासपछि उनीहरु सरप्राइज पार्टीका लागि गुफामा गएका थिए । यो टिमका एक खेलाडीको नाम गेम छ, यो यो पटक गुफामा गएका थिएनन् ।
उनले कासोद अखबारलाई बताएअनुसार टिम यसहअघि तीन पटक गुफामा गइसकेको थियो । उनले भने, ‘हामी गुफामा जानु अघि तयारी गथ्र्यौं । हामीसँग चर्ट हुन्थ्यो र सबै जान फिट छन् कि छैनन् पहिले नै पत्ता लगाउँथ्यौं ।’
गेमका अनुसार उनको स्वास्थ्य ठीक नभएका कारण उनी यो पटक गुफामा नगएका हुन् । उनले भने, ‘हामी कि अभ्यासका लागि फुगामा जान्थ्यौं कि टिमका कुनै सदस्यको बर्थडेमा । यो कुनै बर्थ डे योजना हुनसक्छ ।’
यो साता गुफाबाट एउटा चिठ्ठी आयो । फुटबल प्रशिक्षक एकापोलले आफ्नो हजुरआमालाई निराश नहुन आग्रह गरेका छन् । साथै बच्चाका आमाबुबासँग माफी मागेका छन् ।
यसअघि गुफामा जाँदा पानी नपरेकाले उनीहरु आफैं फर्किन्थे । तर, यो पटक सुसलधारे पानी पर्यो । जंगलमा आएको पानीले गुफाको प्रवेशद्धार बन्द भएपछि १२ बालक र फुटबल प्रशिक्षक गुफाभित्रै फसे । गुफामा पानी लगातार बढ्यो ।
ताम लुङ्ग गुफाको लम्बाई १० हजार ३१६ मिटर लामो छ र थाइल्याण्डको चौथो लामो गुफा हो ।
बेलायती उद्दार विभागका बिल वाइटहाउसका अनुसार गोताखोरहरु अधिकांश रुपमा बाढीग्रस्त र साँधुरो गल्लीमा १५०० मिटरसम्म गएर पत्ता लगाएका थिए ।
यो गुफामा १९८६ मा एक जना विदेशी ७ दिनसम्म हराएको र पछि उद्दार गरिएको स्थानीय समुदायका एक नेताले बताएको स्थानीय अखबारहरुमा उल्लेख छ । यद्यपि त्यसबेला बाढी आएको थिएन । २०१६ मा पनि एक चिनियाँ भाषाका शिक्षक तीन महिनासम्म हराएका थिए । उनलेल आफू तपश्या गर्न गएको बताएका थिए ।
खोजीका क्रममा उनी भेटिएनन् तर, पछि नजिकैको एक होटलमा घुमिरहेको अवस्थामा भेटिएको थियो ।
बीबीसीको सहयोगमा
