दुर्घटनामा परेका पत्रकार खनालको निधन

४ साउन, झापा । झापाका पुराना पत्रकार एवं साहित्यकार गोपीकृष्ण खनालको दुर्घटनामा परी निधन भएको छ ।

नयाँ कामना साप्ताहिकका प्रधानसम्पादक समेत रहेका ७१ वर्षे खनाल नेपाल पत्रकार संघका पूर्व अध्यक्ष हुन् ।

बिहीबार दिउँसो ३ः३० बजे सवारी दुर्घटनामा परेर गम्भीर घाइते भएपछि उनलाई उपचारका लागि बिर्तामोडको बीएण्डसी अस्पतालमा भर्ना गरिएको थियो ।

उपचारकै क्रममा गएराति खनालको निधन भएको उनका भतिजा भानुभक्त खनालले जानकारी दिए ।

पूर्व–पश्चिम राजमार्गअन्तर्गत बिर्तामोड–२ रामचोकमा साइकलमा यात्रारत उनलाई मे१ज ६५८ नंको जीपले पछाडिबाट ठाक्कर दिएको थियो ।

ठक्कर दिने जीपका चालक र सवारी साधन प्रहरीको नियन्त्रणमा रहेको जनाइएको छ ।

उनको शवलाई कनकाई नदीमा शुक्रबार नै दिउँसो अन्त्येष्टि गरिने भएको छ ।

विसं २००४ पुस २९ गते तेह्रथुम जिल्लाको खाम्लालुङ गाविस वडा नं ९ सामथाङमा जन्मिएका खनालको बिर्तामोड–४ बसोबास थियो ।

उनले लामो समयसम्म नयाँ कामना साप्ताहिक पत्रकारको प्रधानसम्पादक भएर पत्रिका प्रकाशन गरेका थिए भने ‘मेरो अमेरिका यात्रा’ र ‘बेलाबेलाको बोली’ नामक दुई वटा कृति प्रकाशित गरेका थिए । उनका एक श्रीमती र दुई छोरा छन् ।