२३ साउन, काठमाडौं । संघीय मामिला तथा सामान्य प्रशासनमन्त्री लालबाबु पण्डितले परिपक्व नभई सूचना नदिन मातहतका निकायलाई निर्देशन दिएका छन् ।
मन्त्री पण्डितले आलोकाँचो सूचनाले परिणाम राम्रो नदिने भन्दै समय आएपछि मात्रै सूचना दिन मातहतका निकायलाई सचेत गराएका हुन् । उनले मन्त्रिपरिषदका निर्णय २४ घण्टासम्म नदिने कानुनी प्रावधान रहेको दावी समेत गरे ।
बुधबार काठमाडौंमा आयोजित प्रदेश ३ का स्थानीय तहका जनप्रतिनिधि र प्रशासकीय अधिकृतहरुसँगको सूचनाको हकसम्बन्धी अन्तर्क्रिया कार्यक्रममा बोल्दै मन्त्री पण्डितले सूचना समय नआई दिँदा त्यसले सरकारलाई अप्ठयारोमा पार्ने गरेको पनि स्मरण गराए ।
उनले संचारकर्मीहरुले आलोकाँचो सूचना मागेर अप्ठयारोमा पार्ने गरेको गुनासो पनि गरे ।
मन्त्री पण्डितले परिपक्व भएपछि भने सूचना दिन कन्जुस्याई गर्न नहुने पनि बताए । उनले सूचनाको हक पाउने नागरिकको अधिकार हनन् हुन नदिन सरकार सचेत रहेको पनि दावी पनि गरे ।
