२५ भदौ, काठमाडौं । काठमाडौं महानगरपालिकाले ६ वटा ए डिभिजन क्लबलाई ९ लाख तीन हजार रुपैयाँका दरले अनुदान सहयोग गरेको छ ।
खेल विकासलाई समयानुकुल अघि बढाउन भन्दै महानगरपालिकाले अनुदान दिएको हो । महानगरबाट अनुदान पाउने क्लबहरुमा हिमालयन शेर्पा, मनाङ-मस्याङ्दी, संकटा, सरस्वती, एनआरटी र मच्छिन्द्र छन् ।
सोमबार एक कार्यक्रम गरी मेयर विद्यासुन्दर शाक्यले रकम हस्तान्तरण गरे । ‘ठूला लगानी गरेका क्लबहरुका लागि यो रकम सानो हुनसक्छ,’ शाक्यले भने, ‘तर, यो सहयोगले खेलाडीको मनोवल बढ्ने अपेक्षा गरेका छौं ।’
एन्फाका अध्यक्ष कर्मा छिरिङ शेर्पालेे फुटवल विकासका लागि यो सहयोग कोशेढुंगा भएको दाबी गरे । उनले भने, ‘स्थानीय सरकारले खेलक्षेत्रप्रति आफ्नो स्वामित्व लिएको छ । खुशी लाग्यो ।’
उनले आगामी दिनमा बी र सी डिभिजनका क्लबलाई पनि सहयोग गर्न सुझाव दिएका छन् ।
