२ असोज, काठमाडौं । सांसदहरुले दशैंमा घर जाँदा कोसेली लिएर जानुपर्ने माग गरेका छन् । मंगलबारको संसद बैठकमा सांसदहरुले दशैंमा घर जाँदा जनताहरुले आफूहरुसँग केही अपेक्षा गर्ने भन्दै केही कोसेली लैजान पाउनुपर्ने बताएका हुन् ।
सांसदहरुले कोसेलीको रुपमा निर्वाचन क्षेत्रमा विकास आयोजनाहरु लिएर जान पाउनुपर्ने बताएका हुन् । पाँचथरबाट निर्वाचित बसन्तकुमार नेम्वाङले आफूहरुले संसदबाट धेरै कानून बनाए पनि जनताले त्यसलाई नबुझ्ने भन्दै कोसेलीको रुपमा विकास आयोजना लैजाने वातावरण बनाउन माग गरे ।
‘हामी सबै सांसदहरु आआफ्नो क्षेत्रमा फिर्ता जाँदैछौं । संविधानले सांसदको भूमिकाको जे व्यवस्था गरे पनि हामीले कानून निर्माणमा महत्वपूर्ण समय दियौं । जनताले यो मात्र पर्याप्त बुझ्दैनन् । यो पछि निर्वाचन क्षेत्रमा जाँदा सांसदले के कोसेली (विकास निर्माणका योजना) बोकेर आयो भनेर शुभकामना आदानप्रदान गर्न आतुर छन्’ उनले भने ।
सांसद विमला विश्वकर्माले दशैंमा घर जाँदा विकास बजेट जनतालाई कोसेली दिन पाएमा खुशी हुने बताइन् । समयमा विकास निर्माणको काम अघि बढ्न नसक्दा हतारमा असारे विकास हुने गरेको भन्दै उनले भनिन् ‘सांसदहरु दशैंमा घर जाँदा बजेटलाई हाते कासेलीको रुपमा लैजान पाउँ ।’
