३ माघ, काठमाडौं । पछिल्लो समय वैदेशिक रोजगारीमा जाने नेपालीहरुको संख्या घट्दै गए पनि विप्रेषण (रेमिट्यान्स) आप्रवाह भने निरन्तर बढिरहेको छ ।
चालु आर्थिक वर्षको पहिलो ५ महिनामा रेमिट्यान्स बढेर ३ खर्ब ७६ अर्ब ५९ करोड रुपैयाँ पुगेको नेपाल राष्ट्र बैंकले जनाएको छ ।
चालु आर्थिक वर्षको पहिलो चार महिनामा ३ खर्ब १२ अर्ब २६ करोड रुपैयाँ रेमिट्यान्स भित्रिएको थियो । अघिल्लो आर्थिक वर्षको सोही अवधिमा ३६.४ प्रतिशतले रेमिट्यान्स बढेको थियो ।
५ महिना अर्थात मंसिर मसान्तसम्म आइपुग्दा रेमिट्यान्स बढेर ३ खर्ब ७६ अर्ब ५९ करोड रुपैयाँ पुगेको हो । अघिल्लो आर्थिक वर्षको सोही अवधिको तुलनामा विप्रेषण आप्रवाह ३१.९ प्रतिशतले वृद्धि भएको हो ।
अघिल्लो वर्षको सोही अवधिमा विप्रेषण आप्रवाह ०.८ प्रतिशतले घटेको थियो । अमेरिकी डलरमा विप्रेषण आप्रवाह १९.२ प्रतिशतले वृद्धि भएको छ ।
अघिल्लो वर्ष यस्तो आप्रवाह ३.२ प्रतिशतले बढेको थियो । समीक्षा अवधिमा खुद ट्रान्सफर आय २९.८ प्रतिशतले वृद्धि भई रु.४२८ अर्ब ५९ करोड पुगेको छ । अघिल्लो वर्षको सोही अवधिमा यस्तो आय ०.५ प्रतिशतले घटेको थियो ।
अन्तिम श्रम स्वीकृतिका आधारमा वैदेशिक रोजगारीमा जाने नेपालीको संख्या समीक्षा अवधिमा ४०.२ प्रतिशतले घटेको छ । अघिल्लो वर्षको सोही अवधिमा यस्तो संख्या २.५ प्रतिशतले घटेको थियो ।
समीक्षा अवधिमा मलेसिया जाने नेपालीहरुको संख्या उल्लेख्य मात्रामा घटे पनि रेमिट्यान्स भने लगातार बढीरहेको राष्ट्र बैंकले जनाएको छ ।
