न्याय सेवाको उपसचिवको परीक्षा : ७ पदमा कोही पनि सिफारिस भएनन्

३१ वैशाख, काठमाडौं । लोक सेवा आयोगले न्याय सेवातर्फ लिएको उपसचिव वा सो सरहको परीक्षामा ७ पदमा कुनै पनि उम्मेदवार सिफारिस हुन सकेका छैनन् । न्याय सेवाको न्याय समूह, कानुन समूह र सरकारी वकिल समूहबाट ७ पदमा उम्मेदवार सिफारिस हुन नसकेका हुन् ।

न्याय समूहमा आदिवासी जनजाती तर्फ १ र मधेशी तर्फ १ गरी २ पदमा, न्याय सेवाको कानून समूहमा दलित तर्फ १ पदमा र न्याय सेवाको सरकारी वकिल समूहतर्फ खुला २, महिला १ र मधेशी १ गरी ३ पदमा गरी जम्मा ७ पदमा उम्मेदवार सिफारिस हुन नसकेको लोक सेवा आयोगका प्रवक्ता एवम् सहसचिव किरणराज शर्माले जानकारी दिए ।

लोक सेवाले राजपत्रांकित द्वितीय श्रेणी, न्याय, लेखापरीक्षण र व्यवस्थापिका संसद सेवातर्फ विभिन्न समूहमा ५३ जनाको लागि आन्तरिक, खुला तथा समावेशी तर्फ पदपूर्तिका लागि २०७५ मंसिर २६ गते विज्ञापन प्रकाशन गरेको थियो । तर, नियुक्तिका लागि ४६ जना मात्र सिफारिस गरिएको छ ।

प्रवक्ता शर्माले भने, ‘रिजल्ट हाम्रो विज्ञापन नम्बर अनुसार हुन्छ । पहिलो विज्ञापन नम्बरमा जसले बढी नम्बर ल्यायो त्यही पास हुन्छ । जस्तो- कुनै उम्मेदवार महिला र खुल्ला दुवैमा पास भएको रहेछ भने उसले खुला रोज्छ र महिला छाड्छ । यसरी खाली हुन्छ । अर्थात् लिखितमा पास हुँदाहुँदै पनि अन्तर्वार्तामा पहिलो विज्ञापनबाट छनोट भएका कारण परीक्षार्थी पुगेनन् ।’

हेर्नुहोस् यो तालिका

विज्ञापन भएका पदहरु आन्तरिक तर्फ ३६, खुला तर्फ १०, महिला तर्फ ३ र आदिवासी/जनजाति तर्फ १, मधेशी तर्फ २ र दलित तर्फ १ जना माग गरिएको थियो । ती पदहरु न्याय सेवाको न्याय समूहमा २५, कानून समूहमा १२, सरकारी वकिल समूहमा १३, लेखापरीक्षण सेवामा १ र व्यवस्थापिका संसद सेवामा २ वटा रहेका थिए ।

परीक्षामा प्रदेश ३ बाट सबैभन्दा धेरै र प्रदेश २ बाट सबैभन्दा कम उम्मेदवार उत्तीर्ण भई नियुक्तिका लागि सिफारिस भएका छन् । प्रदेश १ बाट १३ जना, प्रदेश २ बाट १ जना, प्रदेश ३ बाट १५ जना, गण्डकी प्रदेशबाट ३ जना, प्रदेश ५ बाट ११ जना र सुदूरपश्चिम प्रदेशबाट ३ जना सिफारिश भएका छन् ।

जिल्लागत रुपमा हेर्दा काठमाडौंका पाँच जना, काभ्रे, गुल्मी, झापा र रुपन्देहीका तीन/तीन जना, अर्घाखाँची, कास्की, नुवाकोट, भक्तपुर, मोरङ र सुनसरीका दुई/दुई जना सिफारिस भएका छन् । यसैगरी अछाम, ओखलढुंगा, कैलाली, खोटाङ, धादिङ, पाल्पा, बाँके, बारा, बैतडी, भोजपुर, रुकुम, संखुवासभा, सिन्धुपाल्चोक, सिन्धुली र स्याङ्जाका एक/एक जना उम्मेदवार सिफारिशमा परेका लोकसेवा आयोगले जनाएको छ ।

सिफारिश भएका उम्मेदवारहरुको उमेर समूह ३५ वर्ष मुनिका १३ जना, ३५ देखि ४० वर्षका १६ जना, ४० देखि ४५ वर्षसम्मका १४ जना र ४५ वर्ष माथिका ३ जना रहेका छन् ।

उपसचिव वा सो सरह पदको लिखित परीक्षा २०७५ साल माघ २७ देखि फागुन ८ गतेसम्म लिइएको थियो । २०७५ साल फागुन २१ गते लिखित परीक्षाको नतिजा प्रकाशन भएकोमा अन्तर्वार्ताको लागि छनौट भएका उम्मेदवारहरुको २०७६ साल वैशाख ८ गते देखि १० गतेसम्म द्वितीय चरणको ल्याकत परीक्षा अन्तर्गत In Basket Exercise परीक्षा र वैशाख १६ गतेदेखि २९ गतेसम्म अन्तर्वार्ता कार्यक्रम सञ्चालन गरिएको थियो ।

उपसचिव वा सो सरह पदका उम्मेदवारहरुले लिखित परीक्षा अन्तर्गत प्रथम पत्रको प्रशासन र व्यवस्थापन विषयमा १०० पूर्णांक (सबै सेवा समूहका लागि एउटै) र द्वितीय पत्र सेवा सम्बन्धी (प्रत्येक समूहका लागि छुट्टछुट्टै) विषयमा १०० पूर्णांकको विषयगत परीक्षा दिनुपर्ने व्यवस्था छ । लिखित परीक्षाबाट छनौट भएका उम्मेदवारहरुको द्वितीय चरणमा ल्याकत परीक्षण अन्तर्गत ३० पूर्णांकको In Basket Exercise र तृतीय चरणमा ३० पूर्णांकको अन्तर्वार्ता लिने व्यवस्था छ ।

लिखित परीक्षामा उम्मेदवारको ज्ञानको परीक्षण हुन्छ भने In Basket Exercise मा व्यवहारिक कार्यसम्पादन गर्ने तरिकाको लेखाजोखा, दिनहुँजसो गरिरहनुपर्ने कामको प्राथमिकता गर्ने तरिका, पुष्ट्याई र आधारको चिन्तन र तरिकाको परीक्षण हुन्छ । यस्तै अन्तर्वार्तामा व्यवहारिक प्रस्तुतीकरण र विश्लेषणात्मक क्षमता समेत परीक्षण गरी नियुक्तिका लागि सिफारिश गर्ने गरिन्छ ।