९ असार, रामेछाप । सुनापति गाउँपालिका २ का सवओभरसियर हिमाल खड्कालाई वडाअध्यक्ष कमल केसीले कुटपीट गरेपछि प्राविधिकहरुले सोमबारदेखि कामकाज ठप्प पारेका छन् ।
वडाअध्यक्ष माथि एक हप्ताभित्र कानुनी कारबाही सुरु नगरे जिल्लाभरिकै प्राविधिक आन्दोलनमा उत्रिने उनीहरुले चेतावनी दिएका छन् ।
राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाई भवन तर्फका असिष्टेन्ट सव इञ्जिनियर वझाङका खड्कामाथि वडाअध्यक्ष केसीले आइतबार साँझ होटलमा खाना खाइरहेको बेला कुटपीट गरेका थिए । वडाको लेटरप्याडको दुरुपयोग गरी पुनर्निर्माणसम्बन्धी सूचना जारी गरेकाले झापड हानेको वडाध्यक्ष केसीले बताएका छन् ।
३ वर्षदेखि सो वडामा कार्यरत खड्कामाथि वडाअध्यक्षले पटक पटक दुर्वेवहार गरेको प्राविधिक खड्काले बताए । घटनापछि जिल्ला सदरमुकाम मन्थलीमा जम्मा भएका प्राविधिहरुले सोमबार रामेछापका प्रमुख जिल्ला अधिकारीलाई ज्ञापन पत्र बुझाउँदै दोषीमाथि कानुनी कारबाहीको माग गरेका छन् ।
ज्ञापनपत्र बुझाएपछि पुनर्निर्माण प्राधिकरण प्रविधिक सञ्जालले पत्रकार सम्मेलन गरी वडाअध्यक्ष केसीमाथि कारबाही गर्न माग गरेको छ । संयोजक अरविन्दकुमार महतोद्वारा जारी विज्ञप्तिमा प्रशासनले दोषीलाई ७ दिनभित्र कारबाही नगरे रामेछाप जिल्लाका सबै स्थानीय निकायको पुनर्निर्माणका कामाकाज ठप्प पार्ने चेतावनी दिइएको छ ।
