१० भदौ, काठमाडौं । नेपाली यू–१९ क्रिकेट टिम अभ्यास खेलमा श्रीलंकाको एसएससी यू–२३ क्रिकेट टिम सँग तीन विकेटले पराजित भएको छ ।
श्रीलंकामा मंगलबार भएको खेलमा नेपाली युवा टिम अन्तिम ओभरमा पराजित हुन पुगेको हो । २४१ रनको चुनौती पछ्याउँदै ब्याटिङ गरेको एसएससीले निर्धारित ४२ ओभरमा सात विकेटको क्षतिमा पूरा गरेको हो ।
यसअघि टस हारेर पहिले ब्याटिङ गरेको नेपालले निर्धारित ४२ ओभरमा सात विकेटको क्षतिमा २४० रन बनाएपछि एसएससी यू–२३ क्रिकेट टिमले २४१ रनको चुनौती पाएको थियो ।
नेपालका लागि आशिफ शेखले ८८ रन बनाए । उनकै उत्कृष्ट प्रदर्शनमा नेपालले ठूलो स्कोर बनाएको हो । त्यस्तै, सन्दीप जोराले ३३, रित गौतमले ३१ र पवन सर्राफले ३० रनको योदान दिए ।
श्रीलंकामा यहि भदौ १९ गतेदेखि एसीसी यू–१९ एसिया कप सुरु हुदैछ । नेपाल रहेको समूह ‘बी’ मा आयोजक श्रीलंका, बंगलादेश र यूएई रहेका छन् ।
