२९ मंसिर, काठमाडौं । अटो व्यवसायीहरुको संस्था नाडा अटोमोवाइल एशोसिएसनको नयाँ कार्यसमिति सर्वसम्मत हुने भएको छ ।
नयाँ नेतृत्वका लागि निर्वाचित हुने एक पदका लागि धेरै जनाको उम्मेद्वारी नपरेका कारण सर्वसम्मत नयाँ नेतृत्व चयन हुने पक्का भएको हो ।
नयाँ नेतृत्वका लागि आइतबारसम्म मनोनयन गर्ने समय राखिएकोमा अध्यक्षका लागि कृष्णप्रसाद दुलालको मात्रै उम्मेद्वारी परेको नाडा निर्वाचन समितिले जानकारी दिएको छ ।
उनको मात्रै उम्मेद्वारी परे पनि निर्वाचित भएको आधिकारिक घोषणा भने आगामी पुस ४ गते हुने साधारणसभाले गर्नेछ । दुलाल यस अघि एशोसिएसनको उपाध्यक्ष थिए ।
अध्यक्षका लागि अर्का व्यवसायी प्रकाश कपुरी समेत आकांक्षी थिए । तर उनले अन्तिममा आएर उम्मेद्वारी नदिने निर्णय लिएका छन् ।
अध्यक्षमात्रै होइन एशोसिएसनको १८ जना कार्यसमिति समेत समेत सर्वसम्मत निर्वाचित हुने समितिले जानकारी दिएको छ ।