एसी मिलान कुनै बेला इटालियन जायन्ट क्लबको रुपमा रहेको थियो । पाउलो माल्दिनी, क्लिरेन्स सिडोर्फ, काका, आन्द्रे पिर्लो जस्ता खेलाडी एकै पटक मिलानबाट खेल्थे । पछि डेभिड बेकह्याम,रोनाल्डिन्हो जस्ता खेलाडीले पनि खेले । मिलान र इन्टर मिलानले युभेन्ट्स पछि समान १८ उपाधि जितेका छन् ।
तर अहिले अवस्था फरक छ । एसी मिलानले २१ वर्ष यताकै फराकिलो हार बेहोरेको छ ।
इटालियन सिरी ए मा मिलान आइतबार एटलान्टासंग ५-० ले पराजित भयो । सन् १९९८ मा रोमासंग ५-० ले पराजित भएयता यो नै मिलानको ठूलो हार हो ।
एटलान्टालाई घरेलु मैदानमा फराकिलो जित दिलाउन जोसेफ इदिसिले दुई तथा अलेजान्द्रो गोमेज, मारियो पासालिच र लुइस मुरिएलले एक-एक गोल गरे ।
फराकिलो हारपछि १७ खेलबाट २१ अंक रहेको मिलान अक तालिकामा दशौँ स्थानमा छ ।
यसै सिजन च्याम्पियन्स लिगमा डेब्यु गर्दै अन्तिम १६ मा पुगेको एटलान्टा लिगमा पनि उत्कृष्ट प्रदर्शन कायम राखेको छ । १७ खेलबाट ३१ अंक जोडेको एटलान्टा लिगमा पाँचौ स्थानमा उक्लेको छ ।