२५ पुस, वीरगञ्ज । वीरगञ्जमा पानीमा डुबेको अवस्थामा एक युवकको शव फेला परेको छ ।
वीरगञ्ज-१५ भिश्वामा अन्दाजी २८/३० वर्षीय युवकको शव फेला परेको जिल्ला प्रहरी कार्यालय पर्साका डीएसपी गौतम थापाले पुष्टि गरेका छन् । शवको पहिचान खुल्न सकेको छैन ।
‘दुईवटा घरको बीचमा खाली जग्गा थियो । जग्गामा ८ फिटभन्दा गहिरो पोखरी बनेको रहेछ । पानीमा फोहोर फालिएको थियो । त्यही युवकको शव फेला परेको हो,’ डीएसपी थापाले भने ।
युवकको शरीरमा कुनै किसिमको चोटपटक र निल डाम नदेखिएको र पोष्टमार्टमपछि मात्रै मृत्युको कारण थाहा हुने डीएसपी थापाको भनाइ छ । शव पोष्टमार्टका लागि नारायणी अस्पतालमा पठाइएको छ ।
भिश्वाबाट नेशनल मेडिकल जाने बाटो छेउको खाली जग्गामा दिउँसो साढे दुई बजेतिर शव देखेपछि स्थानीयले प्रहरीलाई खबर गरेका थिए । केही दिन अघिदेखि नै पानीमा शव रहेको हुन सक्ने अनुमान प्रहरीले गरेको छ ।
केही दिनअघि ड्राईपोर्ट परवानीपुर सडकखण्डमा मृत भेटिएका युवकको भने पहिचान खुलेको छ ।
मृतक पर्साको बहुदरमाई नगरपालिका-५ भौराटार बस्ने २५ वर्षीय सुरेन्द्रकुमार सहनी रहेको प्रहरी निरीक्षक कुशल बर्तौलाले बताए ।
टाउको र घाँटीमा चोेट लागेको अवस्थामा वीरगञ्ज जगरनाथपुरमा पुस २१ गते उनको शव फेला परेको थियो ।
सहनीको हत्या भएको आशंका गरिएको छ । घटनाबारे अनुसन्धान भइरहेको जिल्ला प्रहरी कार्यालय पर्साले जनाएको छ ।
