३० फागुन, काठमाडौं । मिर्गौलाको सफल प्रत्यारोपणपछि प्रधानमन्त्री केपी शर्मा ओली त्रिवि शिक्षण अस्पतालबाट डिस्चार्ज भएका छन् ।
उनी स्वास्थ्य लाभपछि शुक्रबार साँझ प्रधानमन्त्रीको सरकारी निवास बालुवाटार फर्किएका छन् । ‘उहाँको स्वास्थ्यमा उल्लेख्य सुधार भएको छ । त्यसैले डिस्चार्ज गरेका हौं’ अस्पतालका कार्यकारी निर्देशक प्रा. डा. प्रेमकृष्ण खड्गाले भने ।
अस्पतालबाट बाहिरिने क्रममा उनलाई चिकित्सकहरुले समाएर गाडीसम्म ल्याएका थिए । गाडी चढ्नुअघि प्रधानमन्त्री ओलीले हाँसेर हात हल्लाएका थिए ।
सामान्य त एक सातामा नै फलोअपका लागि अस्पताल आउनुपर्ने हो तर अस्पतालको मिर्गौला रोग तथा प्रत्यारोपण चिकित्सा विभागकी प्रमुख डा. दिव्या सिंह शाह आफैं प्रधानमन्त्रीको निजी चिकित्सक छिन् र ओली बालुवाटारमा नै चिकित्सकहरूको प्रत्यक्ष निगरानीमा रहनेछन् ।
विषेश इन्भेस्टिगेसन गर्नुपर्ने भए मात्र प्रधानमन्त्री अस्पताल आउनसक्ने डा. खड्गाले बताए ।
तत्काल नियमित भेटघाट नगर्ने
चिकित्सकहरुका अनुसार बालुवाटारमा चिकित्सकको प्रत्यक्ष निगरानीमा रहँदा प्रधानमन्त्रीले आवश्यक सतर्कताका साथ नियमित काम गर्न सक्ने छन् ।
तर तत्काल नियमित भेटघाट र बाहिर हिँडडुल गर्न मिल्दैन । उपचारमा संलग्न प्रा. डा. उत्तम शर्माले भने, ‘बालुवाटार गइसकेपछि पनि धेरै मानिससँग भेटघाट गर्न दिँदा उहाँलाई संक्रमणको जोखिम हुन्छ ।’
यो पनि पढ्नुहोस
प्रधानमन्त्रीको उपचार खर्च ५ देखि ६ लाख रुपैयाँ
चिकित्सकहरुका अनुसार मिर्गौला प्रत्यारोपण गरेको व्यक्तिलाई तीन महिनासम्म संक्रमणको उच्च जोखिम हुन्छ । त्यसैले यो अवधिसम्म भीडभाड तथा सार्वजनिक कार्यक्रमहरुमा नजान प्रधानमन्त्री ओलीलाई सुझाइएको छ ।
उनीहरुका अनुसार प्रधानमन्त्रीलाई बालुवाटारमा शान्त र सफा वातावरणमा राख्नुपर्छ । त्यसअनुसारकै व्यवस्था बालुवाटारमा मिलाइएको उनको निजी सचिवालयले जनाएको छ ।
प्रधानमन्त्री ओली दोस्रो मिर्गौला प्रत्यारोपणका लागि १९ फागुनमा अस्पताल भर्ना भएका थिए । उनको शरीरमा २१ गते मिर्गौला प्रत्यारोपण गरिएको थियो ।
अस्पतालमा रहँदा उपचारमा संलग्न चिकित्सकहरु बाहेक आठौं दिन मिर्गौला दाता समीक्षा संग्रौला र नवौं दिन प्रधानमन्त्री पत्नी राधिका शाक्यलाई भेट्न दिइएको थियो ।
तस्वीरः विकास श्रेष्ठ/अनलाइनखबर
