काठमाडौं । टेनिस स्टार रोजर फेडेरर र उनकी श्रीमती मिर्काले स्वीट्जरल्याण्डका असुरक्षित परिवारलाई एक मिलियन स्विस फ्रांक सहयोग गरेका छन् ।
अहिले विशवभर फैलिएको कोरोना भाइरस महामारीको प्रभाव स्वीट्जरल्याण्डमा समेत परेको छ । स्वीटजरलयाण्डमा अहिलेसम्म १० हजार बढी कोरोनाबाट संक्रमित छन् भने १३५ जनाको मृत्यु भइसकेको छ ।
सोही कारण फेडेरर दम्पतीले कोरोनाबाट प्रभावित परिवारका लागि आर्थिक सहयोगको घोषणा गरेका हुन् । उनीहरुले आर्थिक अवस्था कमजोर भएका परिवारलाई सहयोग गर्न अपिल गरेका छन् ।
‘यो सबैका लागि चुनौतीपूर्ण समय हो । कोही पछाडी हट्ने समय हैन ।’ फेडेररले ट्वीटरमा भनेका छन् । ‘हाम्रो सहयोग सुरुवात मात्र हो । धेरै परिवारलाई यसको आवश्यकता छ र आशा गर्छौं अरु सहयोग समेत जोडिनेछन् ।’ उनले सबै मिलेर यो संकटबाट बाहिर आउन सहयोग गर्नुपर्ने बताए ।
विश्व टेनिस इतिहासमा सबैभन्दा सफल खेलाडी फेडेररले सर्वाधिक २० पटकका ग्रान्डस्लाम उपाधि जितेका छन् ।
गत साता विम्बलडन च्याम्पियन सिमोना हालेपले आफ्नो देश रोमानियामा मेडिकल सामाग्री खरिदका लागि आर्थिक सहयोग गर्ने घोषणा गरेकी थिईन् ।
