१८ वैशाख, काठमाडौं । सरकारले दार्चुला-टिंकर सडकलाई महाकाली लोकमार्गको रुपमा निर्माण गर्ने भएको छ । मन्त्रिपरिषद बैठकले यो सडकको कूल १३४ किमिमध्ये ठेक्का व्यवस्थापन हुन बाँकी ८७ किमि (घाँटीबगर-टिंकर) खण्डको ट्रयाक निर्माण कार्य नेपाली सेनामार्फत गराउने निर्णय गरेको छ ।
भौगोलिक हिसावले निर्माणमा निकै कठीन रहेको यो खण्ड निर्माणका लागि सेनाले जिम्मा पाएको हो । यसअघि यो खण्डलाई महाकाली करिडोरका रुपमा अघि बढाउन खोजिएको थियो ।
यो बाहेकका अरु खण्डमा ठेक्का व्यवस्थापन भइसकेको छ । आर्थिक वर्ष ०६५/६६ बाट निर्माण सुरु भएको यस सडकको काम लामो समयदेखि अलपत्रजस्तो छ ।
निकै कठीन भूगोलका कारण यो सडकका खण्डहरुको निर्माण चुनौतीपूर्ण छ ।
