कोरोना भाइरसपछि लागेको लकडाउन छल्न आफ्नी गर्लफ्रेन्डलाई कारको डिक्कीमा लुकाएर एक प्रान्तबाट अर्को प्रान्तमा ओसार्दै गर्दा दक्षिण अफ्रिकामा एकजना युवक पुलिसको फन्दामा परेका छन् ।
साथै कारको डिक्कीमा लुकेर तस्करीमा पर्न राजी हुने ती युवतीलाई समेत प्रहरीले पक्राउ गरेको बताइएको छ ।
समाचार अनुसार, ती युवकले आफ्नी प्रेमिकालाई कारको डिक्कीमा लुकाएर गाउटेंग प्रान्तबाट पुमालांगा प्रान्त लैजाँदै गरेका थिए । गाउटेंग प्रान्त दक्षिण अफ्रिकाको सबैभन्दा ठूलो सहर जोहानेसबर्ग समेत पर्दछ । सो प्रान्त दक्षिण अफ्रिकामा सबैभन्दा धेरै कोरोना संक्रमित भएको प्रान्त हो ।
सडकमा रहेको ढाटमा रोकिएको कारभित्र चेकजाँच हुँदा डिक्कीमा लुकाएर लैजाँदै गरेकी युवती फेला परेकी थिइन् । दक्षिण अफ्रिकी सञ्चार माध्यमहरुमा प्रकाशित भएको भिडियो अनुसार प्रहरीले कारको डिक्कीमा लुकेकी एक महिलालाई निकाल्दै गरेको देखिएको थियो । ती महिलाले जिन्स तथा टिसर्ट लगाएकी थिइन् ।
डिक्कीमा महिलालाई देखेसँगै पुलिसले आर यू ओके ? भनेर सोधेको सुनिन्छ ।
त्यसपछि ती महिला हातमा ब्याग बोकेर डिक्कीबाट बाहिर निस्किन्छन् र जुत्ता लगाउँथिन् ।
कोरोना भाइरस महामारी रोक्नका लागि मार्च २७ देखि दक्षिण अफ्रिकामा लकडाउन जारी छ । जसमा मानिसहरु खानेकुरा, औषधि तथा अन्य अत्यावश्यक किन्ने कामबाहेकका लागि बाहिर निस्किन प्रतिबन्ध लगाइएको छ ।
एजेन्सी