५ असार, बैतडी । दोगडाकेदार गाउँपालिका-७ चडेपानीका लीलाधर भट्ट क्वारेन्टिनमै आफ्ना बुबाको किरिया गर्न बसेका छन् ।
भारतको दिल्लीबाट कञ्चनपुरको गड्डाचौकी हुँदै आएका उनी चार दिनदेखि भूमिराज मावि चडेपानीको क्वारेन्टिनमा बसिरहेका छन् । बुबा चिन्तामणि भट्टको ६ दिनअघि निधन भएपछि उनले क्वारेन्टिनमै किरिया सुरु गरेका हुन् ।
क्वारेन्टिनमै किरिया बस्न बाध्य भएको उनले गुनासो गरे। घरमै बस्ने व्यवस्था मिलाउन आग्रह गर्दा गाउँपालिकाले घर पठाउन नमानेको स्थानीयवासी केशव भट्टले बताए ।
भारतबाट आएका सबै नागरिकलाई अनिवार्य १४ दिन क्वारेन्टिनमा राख्नुपर्ने निर्देशनअनुसार नै उनलाई क्वारेन्टिनमा राखेको दोगडाकेदार गाउँपालिकाका स्वास्थ्य शाखा प्रमुख नरेन्द्र नाथले बताए ।
लीलाधरको स्वाब सङ्कलन गरी पीसीआर परीक्षणका लागि पठाइएको र १४ दिनअघि नै रिपोर्ट नेगेटिभ आए घर पठाइने उनको भनाइ छ ।
यसअघि गत जेठ दोस्रो साता बैतडीको मेलौली नगरपालिका-७ पच्कोराका रामसिंह रावत पनि क्वारेन्टिनमै आफ्ना बुबाको किरिया बसेका थिए ।
