१८ असार, कैलाली । मुलुकभित्र र बाहिर रहेका नेपालीले चन्दा संकलन गरेर खरिद गरिएको पीसीआर मेसिन डडेल्धुरा अस्पतालमा जडान गरिएको छ । अस्पतालका निमित्त मेडिकल सुपरिटेन्डेन्ट डा. जगदीश विष्टले बुधवार मेसिन जडान गरेर नमुना परीक्षण गरिएको र बिहीबारबाट नियमित परीक्षण सुरु हुने जानकारी दिए । ‘हिँजो नमुना परीक्षण सफल भएको छ,’ उनले भने, ‘आजबाट नियमित परीक्षण सुरु हुन्छ ।’
नागरिकले चन्दा संकलन गरेर खरिद गरेको पीसीआर मेसिनले दैनिक ९० जनाको कोरोना परीक्षण गर्न सक्ने विष्टले बताए ।
पीसीआर मेसिनको अभाव हुँदा यसअघि प्रदेशका सबै जिल्लाको स्वाब धनगढी पठाउने गरिएको थियो । धनगढीमा पनि चाप बढेपछि काठमाडौँ पठाउने गरिएको थियो । काठमाडौँमा स्वाब धेरै भएपछि रिपोर्ट आउन समय लाग्ने गरेकोमा अब डडेल्धुरामा अर्काे मेसिन थपिएपछि केही सहज हुने अपेक्षा गरिएको छ ।
अस्पतालका निमित्त मेसु विष्टले डडेल्धुरामा जडान गरिएको पीसीआर मेसिनले सुदूरपश्चिम प्रदेशका पहाडी जिल्लामा सहजता ल्याउने दाबी गरेका छन् । ‘कैलाली र कञ्चनपुरबाहेक ७ पहाडी जिल्लामा यसले प्रत्यक्ष फाइदा पुराउँछ,’ उनले भने ।
करिब ९६ लाख रुपैयाँमा स्थापना भएको पीसीआर मेसिन खरिद गर्न ह्युमानिटी फाउन्डेसनले चन्दा संकलन गरेकोे थियो । जनताको चन्दा संकलन, संघीय सरकारका उद्योग वाणिज्य तथा आपूर्ति मन्त्री लेखराज भट्टको पहल र उनका स्वकीय सचिव हितेश ओझाको सक्रियताले डडेल्धुरामा पीसीआर मेसिन स्थापना भएको ह्युमानिटी फाउन्डेसनले जनाएको छ ।
सरकारले खरिद गर्ने भनेको मेसिन अझै आएन
नागरिकले चन्दा संकलन गरेर पीसीआर मेसिन खरिद गरे पनि प्रदेश सरकारले यसअघि नै खरिद गर्ने भनेको पीसीआर मेसिन अझै जडान हुन सकेको छैन ।
प्रदेश सरकारले प्रदेशका ३ स्थानमा पीसीआर मेसिन जडान गर्ने निर्णय गरेको थियो । तर, निर्णय भएको ३ महिला पुग्नै लाग्दा पनि अझैसम्म पीसीआर मेसिन आउन सकेको छैन ।
धनगढी, बैतडी र डोटीमा जडान गर्ने भनिएको पीसीआर मेसिन जडान नहुँदा परीक्षणको दायरा बढ्न सकेको छैन ।
गत चैत २५ गते धनगढीस्थित सेती प्रादेशिक अस्पताल तथा पहाडी जिल्लाहरूमा बैतडी र डोटीका जिल्ला अस्पतालमा प्रयोगशाला स्थापना गर्ने प्रदेश सरकारको निर्णय अलपत्र परेको छ । वैशाखभित्रै जडान गर्ने प्रतिबद्धता जनाएको सरकारले मध्य असारसम्म पनि जडान गर्न सकेको छैन ।
सरकारले निर्णय गरेको ३ महिनासम्म पनि उपकरण नपुग्दा समस्या भएको जिल्ला अस्पताल बैतडीका निमित्त मेडिकल सुपरिटेन्डेन्ट डा. वसन्त राज जोशीले बताए । ‘मेसिन कहिले आउँछ भनेर कुरेर बसेका छौँ,’ उनले भने, ‘उपकरण नहुँदा बैतडीका मात्रै ४ सय बढीको नतिजा आउन बाँकी छ ।’ यता डोटीबाट संकलन गरिएको २६ सय स्वाबमध्ये अझै ६ सय ८२ जनाको रिपोर्ट आउन बाँकी छ ।
पीसीआर मेसिन जडान नहुँदा संकलित स्वाबहरूको रिपोर्ट आउन पनि ढिलाइ भइरहेको हो । प्रदेश सरकारले डोटीमा पीसीआर मेसिन जडान गरे निकै सहज हुने जिल्ला अस्पताल डोटीका मेसु डाक्टर ज्योति पाण्डेले बताइन् । ‘अहिलेसम्म हामीलाई निकै समस्या परेको छ,’ उनले भनिन्, ‘आफ्नै जिल्लामा पीसीआर मेसिन जडान भयो भने परीक्षणको दायरा बढ्छ । रिपोर्ट पनि तत्काल सार्वजनिक गर्न सकिन्छ । यस्तो भयो भने कोरोनाको संक्रमणलाई नियन्त्रण गर्न सकिन्छ ।’
सामाजिक विकास मन्त्रालयले भने मेसिन खरिदको प्रक्रिया अन्तिम चरणमा रहेको जनाएको छ । ‘३ वटा उपकरण खरिदको तयारी अन्तिम चरणमा पुगेको छ,’ सामाजिक विकास मन्त्रालय जनस्वास्थ्य महाशाखा प्रमुख तथा प्रवक्ता नरेन्द्र सिंह कार्कीले भने, ‘सम्झौता भइसक्यो अब आउन बाँकी छ ।’
