१४ मंसिर, काठमाडौं । स्टिभ स्मिथको शतक र बलरहरुको उत्कृष्ट प्रदर्शनको मद्धतले दोस्रो एकदिवसीयमा भारतलाई पराजित गर्दै अस्ट्रेलियाले तीन खेलको सिरिज एक खेल अगावै जितेको छ । पहिलो एकदिवसीय अस्ट्रेलियाले ६६ रनले जितेको थियो ।
सिड्नीमा आइतबार भएको खेलमा घरेलु टोली अस्ट्रेलियाले भारतलाई ५१ रनले पराजित गरेको हो । अस्ट्रेलियाले दिएको ३९० रनको लक्ष्य पछ्याएको भारतले निर्धारित ५० ओभरमा ४ विकेट गुमाएर ३३८ रन मात्र बनाउन सक्यो ।
भारतका लागि कप्तान विराट कोहलीले सर्वाधिक ८९ रन बनाए । उनले ८७ बल खेल्दै ७ चौका र २ छक्का प्रहार गरे । यस्तै केएल राहुलले ७६ रन बनाए भने श्रेयास ऐरले ३८, शिखर धवनले ३० तथा मायांक अग्रवाल र हार्दिक पाण्ड्याले समान २८ रन जोडे ।
अस्ट्रेलियाका लागि बलिङमा प्याट कमिङ्सले ३ विकेट लिए । यस्तै जोस हाजेलउड र एडम जाम्पाले २/२ र मोएसिस अनरिकेज र ग्लेन म्याक्सवेलले समान १ विकेट लिए ।
त्यसअघि सिड्नी क्रिकेट मैदानमा टस जितेर पहिले ब्याटिङ गरेको अस्ट्रेलियाले निर्धारित ५० ओभरमा ४ विकेट गुमाएर ३८९ रन बनाएको थियो । अस्ट्रेलियाका लागि लगातार दोस्रो खेलमा शतक बनाउने क्रममा स्मिथले १०४ रन बनाए । उनले ६४ बल खेल्दै १४ चौका र २ छक्का प्रहार गरे । पहिलो विकेटका लागि कप्तान आरोन फिन्च र डेविड वार्नरले शतकीय साझेदारी गर्दै अस्ट्रेलियालाई उत्कृष्ट सुरुवात दिलाएका थिए । यी दुईले पहिलो विकेटका लागि १४२ रनको साझेदारी गरे । वार्नरले ८३ र फिन्चले ६० रन जो८ ।
यस्तै मार्नुस लाबुसचेनले ७० रन योगदान गरे । ग्लेन म्याक्सवेलले आक्रमक ब्याटिङ गर्दै २९ बलमा ४ चौका र ४ छक्का प्रहार गर्दै अविजित ६३ रन बनाए । भारतका लागि मोहम्मद शामी, जसप्रित बुमराह र हार्दिक पाण्ड्याले समान १ विकेट लिए ।
अस्ट्रेलिया र भारतबीचको तेस्रो एकदिवसीय मंगलबार क्यानबेरामा हुनेछ ।
