२०७७ माघ २८ गते १९:२५ 
२८ माघ, काठमाडौं । पोखरामा जारी टाइगर कप आमन्त्रित राष्ट्रिय क्लब भलिबल च्याम्पियनसिपको महिलातर्फ विभागीय टाेली नेपाल पुलिस क्लबले लगातार दोस्रो जित हात पारेको छ ।
पोखरा रंगशालाको भलिबल कोर्टमा बुधबार भएको विभागीय भिडन्तमा पुलिसले पहिलो सेट गुमाएपनि पुनरागमन गर्दै आर्मीलाई ३-१ को सेटमा पराजित गरेको हो ।
आर्मीले पुलिस विरुद्ध पहिलो सेट २५-१८ ले जित्दै खेलमा अग्रता बनाएको थियो । तर पुलिसले उत्कृष्ट पुनरागमन गर्दै त्यसपछि लगातार तीन सेट जित्यो । पुलिसले दोस्रो सेट २५-२३, तेस्रो सेट २५-२२ र चौथो सेट २५-१६ ले जित्दै खेल आफ्नो पक्षमा पारेको हो ।
पहिलो खेलमा पुलिसले घरेलु भलिबलको बलियो टोली तथा उपाधि दाबेदार एपीएफलाई सोझो पराजित गरेको थियो ।
चार टिम सम्मलित प्रतियोगितामा पुलिस २ खेलबाट ६ अंक जोड्दै शीर्ष स्थानमा छ । पुलिसले अब राउण्ड रोबिन लिगको अन्तिम खेलमा न्यु डायमण्डसँग खेल्नेछ । शीर्ष दुई टोलीले शनिबार फाइनल खेल्नेछन् ।
प्रतिक्रिया 4