१७ जेठ, काठमाडौं । जिनेदिन जिदानले स्पानिस क्लब रियल मड्रिडको प्रशिक्षक पद छाड्नुको कारण खुलासा गरेका छन् ।
फ्रान्सेली प्रशिक्षक जिदानले समर्थकको नाममा खुल्ला पत्र लेख्दै क्लबबाट टाढिनुको कारणबारे उल्लेख गरेका हुन् ।
उनले रियल मड्रिडका अध्यक्ष फ्लोरेन्टिनो परेजले आफूलाई सम्मान नगरेको आरोप लगाएका छन् । जिदानले एक सिजन सम्झौता बाँकी छदै रियल छाडेका हुन् ।
‘मैले छाडेँ किनकी क्लबले अब मलाई आवश्यक पर्ने जति विश्वास गर्दैन’ जिदानले लेखेका छन् । सान्टियागो बर्नाबेउमा छँदा जिदानले रियललाई दुई कार्यकालमा गरी ३ च्याम्पियन्स लिग र दुई ला लिगा उपाधि जिताए । तर सन् २००९-१० पछि रियल पहिलो पटक उपाधिविहीन भएपछि जिदानले रियल छाड्ने निर्णय गरेका हुन् ।
त्यस निर्णयको केही दिनपछि जिदानले आफ्नो बहिर्गमनको कारण खोलेका हुन् । उनले क्लबका अध्यक्ष पेरेजसँगको निराश सम्बन्धबारे खुलासा गरेका छन् । साथै गत सिजन रियलले खराब प्रदर्शन गर्दा समर्थन नगरेको आरोप समेत लगाएका छन् ।
रियल ला लिगामा शहरी प्रतिस्पर्धी एट्लेटिकोसँग पछि पर्दै उपिवेता बनेको थियो । जिदानले क्लब छाड्ने निर्णय बारे उक्त पत्रमा सबै वर्णन गरेका छन् ।
उनले रियललाई उच्च स्तरमा रहनका लागि नयाँ दृष्टिकोण आवश्यक रहेको महसुस भएकोले छाडेको पनि बताएका छन् ।
