१७ पुस, काठमाडौं । नेपाली क्रिकेटमा पछिल्लो समय देखिएको विवादले राष्ट्रिय टिमको बन्द प्रशिक्षण पनि प्रभावित भएको छ ।
आगामी फेब्रुअरीमा हुने टी-२० विश्वकप ग्लोबल क्वालिफायरका लागि नेपाल क्रिकेट संघ (क्यान) ले बन्द प्रशिक्षणका लागि छनोट गरेका ३० खेलाडी शनिबारसम्म क्यानको सम्पर्कमा आउनुपर्ने भनिएको थियो ।
तर शनिबार साँझसम्म ११ जना खेलाडी मात्र होटलमा उपस्थित भएको क्यानका कार्यवाहक सचिव प्रशान्तविक्रम मल्लले बताए । केही खेलाडी आउने क्रममा रहेको उनले जानकारी दिए ।
क्यानले तात्कालिन कप्तान ज्ञानेन्द्र मल्ल, उपकप्तान दीपेन्द्र सिंह ऐरी, सोमपाल कामी र कमलसिंह ऐरीलाई कारवाही गर्दै २०२२ को सुरुवाती ६ महिना सेन्ट्रल कन्ट्रयाक्टबाट बाहिर राख्ने निर्णय गर्दै सन्दीप लामिछानेलाई नयाँ कप्तान बनाएपछि विवाद चर्किएको हो ।
क्यानले यी चारसहित ३० खेलाडी बन्द प्रशिक्षणका लागि चयन भएका छन् । क्यानका क्रिकेट म्यानेजर विनोद दासले होटलमा कति खेलाडी आइपुगे भन्ने विषयमा शनिबार रातिसम्म थाहा हुने बताए ।
प्रशिक्षण आइतबारदेखि काठमाडौंमा
पछिल्लो समयको विवाद र मुख्य प्रशिक्षक पुबुदुको आगमनमा ढिलाईले गर्दा यसअघि नै सुरु गर्ने भनिएको बन्द प्रशिक्षण समयमा सुरु हुन सकेन ।
तर अब भने प्रशिक्षण काठमाडौंमै हुने क्रिकेट म्यानेजर विनोद दासले जानकारी दिए । उनका अनुसार आइतबारदेखि प्रशिक्षण सुरु हुनेछ ।
प्रतिक्रिया 4