+
+

बालबालिकाका लागि कोभ्याक्समार्फत ८४ लाख फाइजर खोप आउँदै, असार १५ देखि लगाइने

अनलाइनखबर अनलाइनखबर
२०७९ जेठ १५ गते २०:०७

१५ जेठ, काठमाडौं । सरकारले पाँचदेखि १२ वर्षमुनिका बालबालिकाका लागि आगामी असार १५ देखि कोरोना भाइरस विरुद्धको खोप दिने तयारी गरेको छ ।

कोभ्याक्स सुविधामार्फत बालबालिकाका लागि ८४ लाख फाइजर खोप निःशुल्क प्राप्त हुने भएपछि सरकारले असार १५ देखि दिने तयारी गरेको हो ।

पहिलो चरणमा १५ लाख खोप असार १५ भित्र आइसक्ने स्वास्थ्य सेवा विभागको व्यवस्थापन महाशाखाका प्रमुख डा. रुद्रप्रसाद मरासिनीले जानकारी दिए ।

कोरोनाविरुद्ध खोप अभियानमा नेपालले उल्लेखनीय प्रगति गरेको भन्दै कोभ्याक्स कार्यक्रम अन्तर्गत बालबालिकालाई निःशुल्क खोप उपलब्ध भएको डा. मरासिनीको भनाइ छ ।

‘पहिलो चरणमा १५ असारसम्ममा बालबालिकालाई फाइजरको १५ लाख खोप आउने छ । हामीसँग खोपको भण्डारण क्षमता कम भएकाले एक पटकमा १० लेखि १५ लाख डोज पटक–पटक ल्याउने तयारी गरेका छौं’, डा. मरासिनीले भने, ‘विगतमा फाइजर खोप सञ्चालन भएका २१ जिल्लाका बालबालिकामा पहिला लगाइनेछ ।’

उनका अनुसार ५६ जिल्लामा फाइजर खोप पहिलोपटक सञ्चालन हुने भएकाले स्वास्थ्यकर्मीलाई तालिम दिने काम भइरहेको छ ।

स्वास्थ्य सेवा विभागको तथ्यांक अनुसार पाँचदेखि ११ वर्ष उमेर समूहका करिब ३४ लाख बालबालिका छन् । उनीहरूलाई दुई मात्रा पुग्ने गरी ८४ लाख मात्रा खोप निःशुल्क आउने छ । कोभ्याक्सले बालबालिकालाई निःशुल्क खोप उपलब्ध गराएको विश्वमा नेपाल पहिलो देश हो ।

‘खोप खरीदका लागि साढे ६ अर्ब रुपैयाँ जति पर्छ । सिरिन्ज र घोलक पदार्थ नै कोभ्याक्सबाट नै आउँछ’, डा. मरासिनीले भने,’ कोभ्याक्स सुुविधामार्फत निःशुल्क खोप आउने भएपछि सरकारको रकम जोगिएको छ ।’

१२ वर्षमाथिका व्यक्तिहरूलाई ०.३ एमएलका दरले खोप लगाए पनि पाँच देखि १२ वर्षमुनिका बालबालिकालाई ०.२ एमएलका दरले खोप दिनुपर्छ । फाइजर खोप अल्ट्रा कोल्डचेन माइनस ४४ देखि ८० डिग्री सेल्सियस तापक्रममा भण्डारण गर्नुपर्ने हुन्छ ।

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?