फुटबलमा पाँच खेलाडी परिवर्तनकाे नियम स्थायी रुपमा लागू

३१ जेठ, काठमाडौं । कोरोना महामारीपछि प्रयोगमा आएको फुटबल खेलमा पाँच खेलाडी परिवर्तन गर्न पाउने नियम अब स्थायी रुपमै लागू हुने भएको छ ।

कोरोनाका बेला विश्वभरका फुटबल खेलहरुमा ५ खेलाडी परिवर्तन गरिन थालेको थियो । विश्व फुटबल समुदायबाट त्यसको समर्थन भएको फिफाको अध्यक्ष जियानी इन्फान्टिनोले बताए । त्यसअघि एक खेलमा ३ जना मात्र परिवर्तन गर्ने व्यवस्था थियो ।

अन्तर्राष्ट्रिय फुटबल एशाेसिएसन बोर्ड (आईएफएबी) ले पाँच खेलाडी परिवर्तनको नियमलाई स्थायी रुपमा मान्यता दिएको हो ।

कतारको दोहामा भएको १३६औं वार्षिक साधारण सभाबाट आईएफवीले उक्त निर्णयलाई मान्यता दिएको हो ।

कोभिड-१९ महामारीको समयमा खेलाडीको सुरक्षाका लागि फिफाले मे २०२० मा अस्थायी रुपमा यो व्यवस्था लागू गरेको थियो । त्यसपछि यो ठूला खेल प्रतियोगिताहरुमा समेत लागु हुँदै आएको छ ।

स्थायी रुपमा पाँच खेलाडी परिवर्तन गर्ने नियम आगामी १ जुलाई देखि लागू हुने फिफाले जनाएको छ ।

यस्तै फिफाले नोभेम्बर-डिसेम्बरमा कतार आयोजना हुने फिफा विश्वकपबाट सेमि-अटोमेटेड अफसाइड टेक्नोलोजी प्रयोगमा ल्याउने तयारी गरेको छ ।

पिफा अध्यक्ष इन्फान्टिनोले आईएफएबीको वार्षिक बैठकपछि विश्वकपमा सेमी-अटोमेटिक अफसाइड टेक्नोलोजी प्रयोग गर्ने कि नगर्ने भन्ने विषयमा विज्ञहरूले निर्णय गर्ने बताए ।