एफवान सफ्ट २०औं वर्षमा प्रवेश, थप परिस्कृत प्रविधि निर्माणमा जोड दिने

काठमाडौं । प्रविधि मार्फत डिजिटल वित्तीय सेवा प्रदान गर्दै आएको नेपालको अग्रणी फिनटेक कम्पनी एफवान सफ्ट इन्टरनेशनल २०औं वर्षमा प्रवेश गरेको छ ।

डिजिटल वित्तीय सेवा पुर्‍याउने उदेश्यले सन् २००४ को मार्च ६ तारेखबाट कम्पनीले आफ्नो सेवा सुरू गरेको थियो । १९ वर्षको अवधिमा कम्पनी नेपालको ठूलो र अग्रणी आईटी कम्पनीका रूपमा स्थापित हुन सफल भएको कम्पनीले बताएको छ । कम्पनीले वित्तीय क्षेत्रमा आवश्यक पर्ने सबैखाले प्रविधिको निर्माण गर्दै आएको छ ।

सुरूमा एसएमएस बैंकिङबाट आफ्नो सेवा स्थापना गरेको कम्पनीले हाल वित्तीय क्षेत्रलाई अवश्यक पर्ने इन्टरनेट बैंकिङ, मोबाइल बैंकिङ, भाइबर बैंकिङ, फोनलोन जस्ता निकै रूचाइएका प्रविधिहरू निर्माण गरिसकेको छ । यस्तै एफवान सफ्टले इसेवा र फोनपे जस्ता मोबाइल मार्फत हुने भुक्तानीको समेत विकास गरेको छ । कम्पनीमा हाल १ हजार २ सय भन्दा बढी दक्ष जनशक्तिले रोजगारी पाएका छन् । यो २० वर्षको अवधिमा नेपालको डिजिटल फाइनान्सियल क्षेत्रमा टेवा पुर्‍याउन ठूलो भूमिका खेलेको कम्पनीले जारी गरेको विज्ञप्तिमा उल्लेख छ ।

कम्पनीले निर्माण गर्ने प्रविधिले आम मानिसको दैनिकी सहज बनाओस् र त्यसको फाइदा मुलुकको अर्थतन्त्रलाई पुगोस् भन्ने दृष्टिकोण राखेर प्रविधि निर्माण गरिएको कम्पनीका प्रमुख कार्यकारी अधिकृत सुवास शर्माले बताए । कम्पनीले डिजिटल नेपाल बनाउँदै इकोनोमीलाई नै डिजिटलाइज गरी देशको जीडीपीमा ठूलो योगदान पुर्‍याउने उदेश्य रहेको उनको भनाइ थियो । कम्पनीले आगामी दिनमा अझ मिहिनेतका साथ अत्यधुनिक प्रविधि निर्माणमा सशक्त रूपमा लाग्ने उनले बताए ।