साझाका बिजुली बसले नयाँ रुटमा सेवा थाल्दै, पाटनबाट जोरपाटी पुग्ने

१ जेठ, काठमाडौं । साझा यातायातले नयाँ रुटमा विद्युतीय बसमार्फत सेवा सुरु गर्दैछ । साझा यातायातले पाटनढोका–रत्नपार्क–ज्ञानेश्वर–रातोपुल–गौशाला–चाबहिल–बौद्ध–जोरपाटी–दक्षिणढोका रुटमा सोमबारदेखि ३ वटा बिजुली बस चलाउन लागेको हो ।

साझा यातायातका महाप्रबन्धक महेन्द्रराज पाण्डेयका अनुसार यो रुटमा भविष्यमा १५ वटा बिजुली बस चलाउने योजना छ ।

‘३ वटा बसका लागि हामीले रुट इजाजत पाएका छौं’ उनले भने, ‘अब क्रमशः बिजुली बसहरुमार्फत सेवा थाल्दैछौं ।’

साझा यातायातले ४० वटा बिजुली ल्याएको मध्ये ३ वटा यसअघि नै सञ्चालन गरिसकेको थियो । सोमबारदेखि थप ३ वटा बस सञ्चालनमा आउन लागेको हो ।

सोमबार साढे २ बजेदेखि पाटनढोकाबाट बसहरुले सेवा थाल्दैछन् ।