जापानको टोकियोमा ‘नेपाल फेस्टिबल’ हुँदै

१६ असार, टोकियो । नेपालको पर्यटन प्रवर्द्धन गर्ने उद्देश्यले जापानमा ‘नेपाल फेस्टिवल’को आयोजना हुने भएको छ ।

जापानीज नागरिक नेपाल घुम्न जाउन भन्ने उद्देश्यले फेस्टिवलको आयोजना गरिएको आयोजक गैरआवसीय नेपाली संघ एनआरएन जापानले पत्रकार सम्मेलनमार्फत् जानकारी दिएको छ ।

फेस्टिवल जापानको टोक्यिोस्थित नाकानोमा जुलाई २२ र २३ तारिक (साउन ६ र ७ गते) हुनेछ ।

फेस्टिवलले नेपाली खाना, कला र संस्कृतिसँगै सिंगो नेपाल चिनाउने फेस्टिवलकी उप‐संयोजक संगीता अधिकारीले पत्रकार सम्मेलनमा बताइन् ।

‘फेस्टिवल मार्फत् विश्वको सर्वोच्च शिखर सगरमाथा, भगवान गौतम बुद्धको जन्मभूमि नेपाल भनेर जापानिज नागरिकलाई नेपाल चिनाउने प्रयास गर्ने छौं’ उप‐संयोजक अधिकारीले भनिन् ।

फेस्टिवलको आर्कषण नेपालको हिमालदेखि तराईसम्मका ११ वटा जातजातीको भेषभुषासहित झाँक्रीको प्रस्तुति, लोक भजन, पञ्चेबाजा, जापनीज कलाकारको प्रस्तुति रहेको संयोजक तथा एनआरएन जापानका अध्यक्ष शिवप्रसाद पौडेलले जानकारी दिए ।

‘साथै नेपालको परम्परा, धर्म र संस्कृति झल्कने मन्दिर अथवा घरको निर्माण गर्ने छौं’ उनले भने । फेस्टिवलको उद्घाटनका लागि जापान र नेपालको तर्फबाट वहालवाल मन्त्रीको सहभागिताका लागि नेपाली राजदूतावास जापान र एनआरएन जापानले पहल गरिरहेको पौडेलले बताए ।

फेस्टिवलको अनुमानित खर्च १ करोड ५० लाख येन रहेको आर्थिक संयोजक नवीन निउरेले जानकारी दिए ।

‘एनआरएन जापानले लामो समयसम्म घाटा सहेर भएपनि फेस्टिवलको आयोजना गर्दै आएको थियो । खुसीको कुरा के छ भने गत वर्ष पहिलो पटक फेस्टिवल नाफामा गयो । यसवर्ष पनि नाफामा लाने हाम्रो लक्ष्य छ’ निउरेले भने ।

फेस्टिवलको स्पोनजरमा जापानीज संस्था आइएचएनओ समेत रहेको छ । फेस्टिवलमा नेपाल पर्यटन बोर्डको तर्फबाट बोर्डका प्रमुख कार्यकारी धनञ्जय रेग्मीले आर्थिक सहयोग गर्ने प्रतिवद्धता जनाएको निउरेले अनलाइन खबरलाई बताए ।

फेस्टिवलमा २६ वटा व्यापारिक स्टल रहने आयोजकले जनाएको छ । जसमा १० वटा नेपाली खानाको, १२ वटा व्यापपारिक तथा ४ आयोजकको प्रयोजिनका लागि स्टल रहने, स्टल व्यवस्थापक संयोजक सुवास लामिछानेले जानकारी दिए । फेस्टिवलमा नेपाली खाना, नेपाली कपडा र अन्य नेपाली उत्पादनको कारोबार हुने छ ।

गैरआवसीय नेपाली संघ एनआरएन जापानले सन् २०१२ देखि जापानमा नेपाल फेस्टिवलको गर्दै आएको छ ।

कोरोना महामारीमा भने फेस्टिवल गर्न नसकेको एनआरएन जापानले जनाएको छ ।

आयोजकले फेस्टिवलमा उपस्थित हुने नेपालीलाई नेपाली पोशाकमा उपस्थित भइदिन अनुरोध गरेको छ । साथै आफ्नो सम्पर्कमा रहेका जापानिज नागरिकलाई लिएर आउनसमेत अनुरोध गरेको छ ।