अर्थ मन्त्रालय र राष्ट्र बैंक बीच हार्दिक सम्बन्ध हुनुपर्छ : विष्णु पौडेल

४ साउन, काठमाडौं । पूर्वअर्थमन्त्री एवम् नेकपा एमालेका नेता विष्णु पौडेलले अर्थ मन्त्रालय र नेपाल राष्ट्र बैंक बीच हार्दिक सम्बन्ध हुनुपर्ने बताएका छन् । बिहीबार अर्थ समितिको बैठकमा बोल्दै पौडेलले यस्तो बताएका हुन् ।

‘अर्थ मन्त्रालय र राष्ट्र बैक बीच हार्दिक सम्बन्ध हुनुपर्छ, सम्बन्ध राम्रो छैन भन्ने सन्देश गयो भने त्यसले विश्वासको वातावरण गर्दैन,’ पौडेलले भने ।

नेपालको अर्थतन्त्र नतिजा स्वीकार गर्न सक्ने तर प्रक्षेपण पत्याउन नसक्ने अवस्थामा रहेको उनले बताए । विगतलाई फर्केर हेर्दा कुनै पनि प्रक्षेपण विश्वास नहुने किसिमको भएको पौडेलको भनाइ छ ।

मौद्रिक नीति रोजगारी सिर्जना र उत्पादन वृद्धिमा केन्द्रित हुनुपर्ने उनले बताए । खराब कर्जा र कालो सूचीको संख्या बढ्दै गएकोले यसप्रति पनि ध्यान दिन उनले आग्रह गरे ।