७ साउन, काठमाडौं । आगामी अगष्ट ३ देखि सेप्टेम्बर ३ सम्म भारतमा हुने डुरान्ड कप फुटबलमा नेपाली क्लब त्रिभुवन आर्मी एफसीले पहिलो खेल दिल्ली एफसीसँग खेल्ने भएको छ ।
आयोजक डुरान्ड फुटबल टुर्नामेन्ट सोसाइटीले सावर्जनिक गरेको खेलतालिका अनुसार समूह ई मा रहेको आर्मीले आई लिग क्लब दिल्लीसँग अगष्ट ९ मा कोक्राझारस्थित एसएआई स्टेडियममा खेल्नेछ ।
एसियाकै सबैभन्दा पुरानो र प्रतिष्ठित क्लब फुटबल प्रतियोगिताको यो १३२औं संस्करण हो र नेपाली क्लबले पहिलो पटक खेल्न लागेको हो ।
आर्मीले दोस्रो खेल इन्डियन सुपर लिग (आईएसएल) क्लब चेन्नाइयीन एफसीसँग अगष्ट १४ मा गुहावटीस्थित इन्दिरा गान्धी स्टेडियममा खेल्नेछ ।
यस्तै आर्मी तेस्रो खेल आईएसएलकै अर्को क्लब हैदरवाद एफसी अगष्ट २२ मा इन्दिरा गान्धी स्टेडियममै खेल्नेछ ।
प्रतियोगितामा सहभागि २४ टोलीहरुलाई ६ समूहमा विभाजन गरेर खेलाइनेछ । प्रतियोगिताको साविक विजेता बेंगलुरु एफसी हो भने मोहन बगान र इस्ट बंगलालले सर्वाधिक १६-१६ पटक उपाधि जितेका छन् ।
प्रतिक्रिया 4